Caspianlife, 24 сәуір. Ақтауда 24 жастағы Маржан Сұлтанғалиеваның қазасына қатысты қылмыстық іс қайта жанданды. Марқұмның жақындары полицияның «суицид» деген нұсқасымен келіспей, істің жан-жақты тергелуін талап етіп отыр, деп хабарлайды Caspian News телеарнасы.
Биылғы жылдың 1 қаңтарында Ақтау қаласының тұрғыны Маржан Сұлтанғалиева өз пәтерінен өлі күйде табылған болатын. Құзырлы органдар оқиғаны бірден «өз-өзіне қол жұмсау» ретінде тіркеп, кейін істі тоқтатқан. Алайда, марқұмның анасы Гүлзира Демеуова бұл тұжырыммен үзілді-кесілді келіспейді.
Анасының айтуынша, қызының мінез-құлқынан немесе іс-әрекетінен депрессия белгілері байқалмаған. Керісінше, Маржанның алдағы күндерге құрған жоспары өте тығыз болған:
-
1 қаңтар күні сұлулық салонына баруды жоспарлаған;
-
15 қаңтарға массажға жазылып қойған;
-
26 қаңтарда жүргізуші куәлігін алу үшін емтихан тапсыруға тіркелген.
«Өлімге дайындалған адам мұндай қадамдарға бармайды», — дейді қара жамылған ана. Ол қызының өліміне күйеу баласын кінәлап отыр.
Гүлзира Демеуованың күдігін сот-медициналық сараптаманың қорытындысы одан сайын күшейте түскен. Оның сөзінше, сараптама нәтижесі 50 күнге жуық уақыт бойы кешіктіріліп берілген және онда суицидті растайтын нақты айғақтар жазылмаған.
«Іс материалдарының ішінде тек жауап алу хаттамалары мен процессуалдық процедуралар ғана тіркелген. Ал нақты жүргізілген жұмыстардың материалдары жоқ. Менің талабым біреу: істі жан-жақты тергеп, дактилоскопиялық және өзге де дәлелдемелер арқылы әрбір күдікті сейілтсін», — дейді Гүлзира Демеуова.
Жәбірленуші тараптың мүддесін қорғап отырған Маңғыстау облысы заң консультанттары палатасының мүшесі Ажар Қартбай да тергеудің үстірт жүргізілгенін алға тартады. Оның пікірінше, істі тоқтату туралы шешім нақты дәлелдерге емес, тек болжамдарға сүйенген.
Заңгердің сөзіне сенсек, жүргізілген жұмыстардың нәтижесінде Ақтау қалалық прокуратурасы бұрынғы қаулының күшін жойған. Қазіргі уақытта қылмыстық іс қайта жандандырылып, тергеп-тексеру амалдары басталды.
Аталған оқиға бойынша Ақтау қалалық прокуратурасы мен полиция басқармасы әзірге ресми ақпарат беруден бас тартып отыр. Марқұмның туыстары істің әділ аяқталып, кінәлілер анықталғанша күресетінін жеткізді.