CaspianLife, 4 сәуір. Өткен жылы Атырау облысының табиғи ресурстар және табиғат пайдалануды реттеу басқармасы мен «Қазгипроводхоз институты» ЖШС арасында келісім жасалған болатын.
Осы келісім аясында Жылыой ауданының әкімшілік орталығы – Құлсары қаласынан 60 шақырым қашықтықта су қоймасын салудың техникалық-экономикалық негіздемесі алғаш рет талқыланды. Атырау облысы өңірлік коммуникациялар қызметінің (ӨКҚ) хабарлауынша, жиынға қатысушылар су қоймасының техникалық-экономикалық негіздемесінің үш нұсқасымен танысып, өз ұсыныстарын білдірді.
«Нәтижесінде 220 миллион текше метрлік нұсқа таңдалды», – делінген хабарламада.
Сонымен қатар, басты мақсат – аймақтағы су қауіпсіздігін қамтамасыз ету және Жем өзеніндегі тасқындардың алдын алу екені атап өтілді. Табиғи ресурстар және табиғат пайдалануды реттеу басқармасы басшысының орынбасары Нұргүл Қалиеваның айтуынша, Жылыой ауданында су қоймасын салу мәселесі Кеңес Одағы кезінде де көтерілген, бүгінде оның тиімділігі қайта қаралып отыр. Болашақта бұл су қоймасы Құлсары қаласы мен оған іргелес аумақта мал шаруашылығы және егіншілікпен айналысатын шаруа қожалықтарын сумен қамтамасыз ету мәселесін шешуге сеп болмақ.
«Алдағы уақытта техникалық-экономикалық негіздеме негізінде нақты ұсыныстар әзірленіп, жобалық-сметалық құжаттама дайындалатын болады», – деді Нұргүл Қалиева.
Су қоймасы өңірдің экологиялық және экономикалық тұрақтылығын қамтамасыз ету үшін, сондай-ақ ауданның су қауіпсіздігі үшін маңызды инфрақұрылымдық нысан болмақ.
Суретте: Жылыой ауданы, 2024 жылдың сәуірі (авторы Р.Қойлыбаев)