СaspianLife, 26 мамыр — Темірлан Олжабай мен Ернат Наурыз Халықаралық Golden Time Talent фестивалінде бірінші орынға ие болды.
Түрлі санаттардағы гранд-финал онлайн-форматта өтті. Музыканттар авторлық өңдеуде Вивальдидің «Жыл мезгілдері» топтамасындағы туындыны ойнады.
«Жеңіске жеткенімізге өте қуаныштымыз. Эмоция керемет. Нәтиже бүгін түнде жарияланды. Одан бөлек бізге келісімшарт ұсынылды, шекара ашылып, жағдай тұрақталса, концертке барамыз», — деді Темірлан Олжабай.
Golden Time Talent ұйымдастырушылары АҚШ-тағы Халықаралық байқауда алтын медаль жеңіп алғаннан кейін қазақстандықтардың дарынын байқап, оларды финалға қатысуға шақырыпты.
Темірлан Олжабай мен Ернат Наурыз Қазақ ұлттық өнер университетінде оқып жүрген кезінде танысқан. Айта кетейік, ұжым 2017 жылы құрылған. Олар Димаш Құдайбергеновпен бірге I ‘ m a Singer байқауына Қытайға да барып келген. Дуэт құрылған күннен бастап музыканттар Түркияда, Израильде, Еуропа қалаларында өнер көрсетіп үлгеріпті.