Атырау облысындағы тергеу изоляторында отырған сотталғандар Абай өлеңдерін жатқа оқу сайысына қатысты. Бұл туралы Polisia.kz сайты хабарлады.
28 қазан күні Атырау облысы Қылмыстық-атқару жүйесі департаментіне қарасты УГ-157/1 (тергеу изоляторы) мекемесінде қазақтың ұлы ақыны Абай Құнанбайұлының туғанына 175 жыл толуына орай шығармашылық байқау өтті. Тергеу изоляторының шаруашылық қызметіне қалдырылған 11 сотталған қатысқан шараға мекеме қызметкерлерінен бөлек, «Шапағат» қоғамдық қорының өкілдері төрелік етті.
Эльвира САУҒАБАЕВА, УГ-157/1 мекемесінің теологиялық оңалту жұмыстарын ұйымдастыру тобының аға инспекторы
Ұлы Абайдың өлеңдері арқылы сотталған азаматтардың бойына көптеген жақсы қасиеттерді сіңіріп, олардың тезірек түзелуіне жол ашамыз. Өйткені Абайдың әр өлеңі адам бойындағы игі қасиеттерді дәріптейді.
Екі бөлімнен тұрған шараның алғашқы бөлімінде сотталған азаматтар Абай өлеңдерінен үзінді оқыса, екінші бөлімінде Абайдың өмірі туралы сұрақтарға жауап берді.
Нұрлан, сотталушы
– Абайдың өлеңдерін соңғы рет мектепте оқып едім. Бүгін сол оқығандарымды қайтадан есіме түсірдім. Енді осы шарадан кейін Мұхтар Әуезовтің “Абай жолы” романын оқитын боламын.
Шара соңында жеңімпаздар арнайы сыйлықтармен марапатталды.