CaspianLife, 8 қазан. Үкімет мемлекеттік жәрдемақылардың тізбесі мен оларды тағайындау және төлеу тәртібін бекітті. 2026 жылғы 5 қазандағы №870 қаулы 2027 жылғы 1 қаңтардан бастап күшіне енеді.
Тізімге 10 түрлі төлем енгізілді: бала туған кезде берілетін біржолғы мемлекеттік жәрдемақы; бала күтіміне, көпбалалы отбасыларға және көпбалалы аналарға берілетін ай сайынғы мемлекеттік жәрдемақылар; мүгедектікке және асыраушысынан айырылуына байланысты мемлекеттік әлеуметтік жәрдемақылар; арнаулы мемлекеттік жәрдемақы; I топтағы мүгедектігі бар адамға күтім жасайтын адамдарға берілетін мемлекеттік жәрдемақы; мүгедектігі бар баланы тәрбиелеп отырған адамдарға берілетін мемлекеттік жәрдемақы; арнаулы кәсіптік мемлекеттік жәрдемақы.
Жәрдемақылар отбасының немесе жеке адамның әлеуметтік әл-ауқат деңгейін объективті бағалау негізінде, яғни мұқтаждық қағидаты бойынша тағайындалады. Кейбір төлемдер үшін мұндай бағалау жүргізілмейді.
Әлеуметтік әл-ауқат деңгейі бойынша А немесе В санатына жатқызылған азаматтарға жәрдемақылар мен жерлеуге берілетін біржолғы төлем төленбейді.
Жәрдемақы алу үшін өтініш беруші жеке деректерді, соның ішінде банк құпиясына және басқа да заңмен қорғалатын құпияларға жататын мәліметтерді жинауға және өңдеуге келісім беруі керек. Сондай-ақ өзінің қарыздары мен несиелері туралы ақпарат ұсынуы қажет.
Әлеуметтік әл-ауқат деңгейі балл арқылы есептеледі. Бағалау кезінде отбасының табысы, тұрғын үйі, автокөліктері, жұмыспен қамтылуы, несиелері, әлеуметтік тәуекелдері және басқа да көрсеткіштер ескеріледі. Әдістемеде бес санат қарастырылған.
А санаты (1 800 баллдан жоғары) — әл-ауқаты жоғары отбасылар. Олардың табысы жоғары, бірнеше жылжымайтын мүлік нысаны мен автокөлігі, бизнесі немесе активтері бар. Тұрақты жұмыспен қамтылған және қызметтерге толық қолжетімділігі бар.
В санаты (730-дан 1 799 баллға дейін) — қанағаттанарлық деңгей. Табысы орташа немесе ортадан жоғары, жеке тұрғын үйі мен автокөлігі бар, тұрақты жұмыспен қамтылған және медициналық әрі білім беру қызметтеріне базалық қолжетімділігі қамтамасыз етілген.
С санаты (-30-дан 729 баллға дейін) — қанағаттанарлықсыз деңгей. Табыс төмен немесе тұрақсыз, бір ғана тұрғын үйі болуы мүмкін. Несиелері бар, жұмыспен қамтылуы толық емес немесе мүлде жоқ болуы ықтимал. Балалардың болуы немесе денсаулыққа байланысты мәселелер секілді жекелеген әлеуметтік тәуекелдер кездеседі.
D санаты (-460-тан -29 баллға дейін) — дағдарыстық деңгей. Табыс жеткіліксіз, сапалы жеке тұрғын үйі, қаржылық қоры және тұрақты ақылы жұмысы жоқ. Негізгі қажеттіліктерін өтеуге қаражаты жетпейді.
Е санаты (-459 баллға дейін) — төтенше деңгей. Табыс мүлде жоқ, борыштық жүктеме жоғары, оның ішінде несие бойынша мерзімі өткен берешегі бар. Тұрғын үйі жоқ немесе тұру жағдайы қолайсыз. Жұмысы жоқ, сондай-ақ көпбалалылық, мүгедектік және қызметтерге қолжетімділіктің болмауы сияқты ауыр әлеуметтік тәуекелдер бар.
Дереккөз: Kursiv Media