Caspianlife, 18 маусым. Маңғыстау облысының тұрғындарын шегірткенің көбеюі алаңдатып отыр. Мамандардың айтуынша, биыл жауын-шашынның мол түсуі зиянкестердің жаппай көбеюіне әсер еткен. Өңір бойынша шегірткеге қарсы жалпы көлемі 11 мың гектардан астам аумақты өңдеу жоспарланған, оның жартысына жуығы қазірдің өзінде залалсыздандырылды.
Негізгі жұмыстар Бейнеу және Маңғыстау аудандарында жүргізілуде. Дәл осы аумақтарда зиянкестердің шоғырланған ошақтары анықталған. Облыстық ауыл шаруашылығы және жер қатынастары басқармасының мәліметінше, өңдеу жұмыстары маусым айының соңына дейін толық аяқталуы тиіс.
Сонымен қатар жайылымдар мен егістік алқаптардың сақталуына алаңдаған тұрғындардың өтініштерінен кейін мамандар өңір аумағын тұрақты бақылауда ұстап, жаңа ошақтарды анықтау жұмыстарын жалғастыруда.
– Бейнеу және Маңғыстау аудандарында шегірткенің шоғырланған орындары анықталды. Қазіргі уақытта бұл аумақтарда екі газды автокөлік жұмыс істеп жатыр. Сондай-ақ 15 маманнан құралған арнайы топ жұмылдырылды, – деді Маңғыстау облыстық ауыл шаруашылығы және жер қатынастары басқармасының басшысы Сабит Дүйсекенов.