CaspianLife, 2 наурыз. Екі күн ішінде Астарадағы бақылау-өткізу пунктінен өткендердің басым бөлігі — әзербайжандар. Алайда олардың арасында эвакуациялық дәлізді пайдаланған 50 шетел азаматы, соның ішінде дипломаттар да бар.
Euronews телеарнасының хабарлауынша, елдің оңтүстік-шығыс шетінде орналасқан Әзербайжанның Астара қаласында әскери қызметкерлер шекара бекетінде АҚШ, Израиль және Иран арасындағы басталған қақтығыстан қашып келгендерді қарсы алуда.
Қала Астара өзенінің сол жағалауында орналасқан, дәл осы өзен арқылы Ислам Республикасымен мемлекеттік шекара өтеді. Бақылау-өткізу пунктіне жеткен азаматтарға ыстық шай мен тамақ ұсынылып, кейін құжаттарын тексеру үшін шекаралық бақылау бекетіне жеткізіледі.
Келгендердің басым бөлігі — еліне оралуға шешім қабылдаған Әзербайжан азаматтары. Сонымен қатар шекара бекетіне 50 шетел азаматы келген. Олардың қатарында Сауд Арабиясының 18 дипломаты, БАӘ-нің 6 азаматы, Катардың 10 дипломаты, бір Италия азаматы, 4 Иордания азаматы, Тәжікстаннан 5 адамнан тұратын отбасы, Бангладештің 3 азаматы және Қытайдың 18 азаматы бар.
Бұл дәлізді Польша, Үндістан, Пәкістан, Непал, Бразилия, Тунис және Франция азаматтары да пайдалана алады. Ираннан шығу үшін үшінші елдердің азаматтары «эвакуациялық код» алуы тиіс. Алайда Астарадағы бекетке келгендердің барлығы бұл талапты біле бермейді. Шекара қызметкерлерінің айтуынша, дипломатиялық ведомстволардың хабарламалары елден кетіп жатқан азаматтардың бәріне бірдей жете бермейді.
Өте қарқынды қозғалыс
Түркия азаматы Эрол Эрманның айтуынша, Астараға жету үшін оған екі күн қажет болған, себебі жолдағы қозғалыс «өте қарқынды» болған. Әдетте бұл жол алты сағатта жүріп өтіледі.
«Адамдар алаңдаулы әрі үрей үстінде, — деді ол Euronews тілшісіне. — Барлығы қауіпсіз жерге жетуге тырысуда. Кете алатындар, мүмкіндігі барлар елден шығуға ұмтылуда. Ол жақтағы жағдай күрделі».
Әзербайжанның Сыртқы істер министрлігі өз азаматтарына Иранға барудан бас тартуға кеңес беріп, ал Ислам Республикасында тұрып жатқан азаматтарды елден кетуге шақырды.
Алтай Хаджиев — Әзербайжан азаматы, ол Тегеранға төрт күнге барған.
«Мен Тегераннан кеттім, ол жерде атыстар болды. Құдайға шүкір, аман-есен елге оралдық. Ең бастысы — дін аманбыз, -деді ол Euronews тілшісіне. — Біз Иранда бар болғаны 4–5 күн болдық. Менде Әзербайжанға кері билет бар еді. Ұзақ қалуды жоспарлаған жоқпын».
Жергілікті БАҚ мәліметінше, Әзербайжан билігі шекарада автобустар ұйымдастырған, төтенше қызметтер күшейтілген дайындық режиміне көшірілген. Қазіргі уақытта зардап шеккендер мен қаза тапқандар жоқ.
Бакуде қажет болған жағдайда Ираннан шетел азаматтарын эвакуациялауға әрі қарай да жәрдем көрсетуге дайын екендерін мәлімдеді.
Дереккөз: Euronews
Сурет: Азертадж ақпарат агенттігі