Caspian, 18 қараша. 2025 жылдың 24 қарашасынан бастап Қазақстанда азаматтарды тұрғылықты жері бойынша тіркеу рәсіміне енгізілген өзгерістер күшіне енеді. Енді бұл қызметті тек онлайн түрде — eGov.kz электронды үкімет порталы немесе eGov Mobile мобильді қосымшасы арқылы рәсімдеуге болады.
«Ұлттық ақпараттық технологиялар» акционерлік қоғамының мәліметінше, онлайн-тіркеуден өту үшін пайдаланушыға ЭЦҚ (электрондық цифрлық қолтаңба) және оның есептік жазбасына тіркелген МАБ нөмірі қажет. Процедура толық автоматтандырылған, бұл қызмет алу уақытын айтарлықтай қысқартады. Сонымен қатар, азаматтар Халыққа қызмет көрсету орталықтарындағы өзіне-өзі қызмет көрсету аймақтарында да онлайн форматта тіркеле алады.
Қызмет келесі санаттағы азаматтарға көрсетіледі:
— Қазақстан Республикасының азаматтарына, оның ішінде тұрғын үй иелеріне;
— сот шешімімен әрекетке қабілетсіз немесе шектеулі қабілетті деп танылған 18 жастан асқан адамдардың қамқоршыларына немесе заңды өкілдеріне;
— 14 пен 16 жас аралығындағы балалардың ата-аналарына немесе заңды өкілдеріне.
14 жасқа дейінгі балаларды жеке тіркеуге қою қарастырылмаған. ҚР Азаматтық кодексінің 16-бабына сәйкес, 14 жасқа толмаған баланың тұрғылықты жері ата-анасының немесе заңды өкілінің тұрғылықты жері болып есептеледі.
14–16 жас аралығындағы балаларды ата-аналары немесе заңды өкілдері тіркейді. Сондай-ақ, сот шешімімен әрекетке қабілетсіз деп танылған 18 жастан асқан азаматтарды қамқоршылары жаңа мекенжай бойынша eGov.kz арқылы тіркей алады.
Мемлекеттік жалдамалы тұрғын үйлерге қатысты жаңалықтар
Мемлекеттік жалдамалы тұрғын үйде тұратын азаматтар үшін де өзгерістер бар. Енді мұндай тұрғын үйдің жалға алушысы жалдау шартында көрсетілген тұлғаларды ғана тіркей алады. Егер тіркелуші адамның аты-жөні келісімшарттағы тізімде болмаса, жүйе өтінімді автоматты түрде қабылдамайды.
Мемлекеттік арендадағы үйге тіркеуге байланысты сұрақтар туындаған жағдайда, азаматтарға жергілікті атқарушы органға (ТКШ бөлімі) жүгіну ұсынылады.
Маңызды!
Егер өтініш беруші өзіне тиесілі емес мекенжайға тіркелуге өтініш қалдырса, меншік иесіне 1414 нөмірінен SMS-код жіберіледі. Тұрғын үй иесі бір сағат ішінде тіркеуге келісімін растауы тиіс.
eGov.kz порталы арқылы қызметті қалай алу керек:
-
Порталда авторизациядан өтіңіз.
-
«Азаматтарға» → «Азаматтық, көші-қон және иммиграция» → «Тұрғылықты жері бойынша тіркеу» бөліміне кіріңіз.
-
«Онлайн қызметке тапсырыс беру» батырмасын басыңыз.
-
Электронды өтінімді толтырып, оны ЭЦҚ немесе SMS-код арқылы қол қойыңыз.
-
Қызмет нәтижесін жеке кабинеттегі «Қызметтер алу тарихы» бөлімінен көре аласыз.
eGov Mobile арқылы тіркелу тәртібі:
-
Қосымшаға кіріп, авторизациядан өтіңіз.
-
«Мемлекеттік қызметтер» бөліміне кіріңіз.
-
«Жылжымайтын мүлік және ТКШ» бөлімінен «Қазақстан Республикасы халқын тұрғылықты жері бойынша тіркеу» қызметін таңдаңыз.
-
Қажетті деректерді толтырыңыз және тіркеу себебін көрсетіңіз.
-
Қызметті қол қоюдың кез келген қолжетімді тәсілімен растаңыз.
-
Өтініштің мәртебесін «Хабарламалар» → «Жеке кабинет тарихы» бөлімінен тексеруге болады.
Ерекше жағдайлар
Егер тіркеу жүргізілетін мекенжайдың иелері немесе тең иелері кәмелетке толмаған балалар не сот шешімі бойынша қабілетсіз немесе шектеулі қабілетті тұлғалар болса, мұндай тіркеу тек ХҚКО бөлімдерінде офлайн түрде жасалады.
Онлайн форматқа көшу оң нәтижесін көрсетіп отыр. 2025 жылдың басынан бері Қазақстанда тұрғылықты жері бойынша онлайн-тіркеу қызметін 750 мыңға жуық адам пайдаланып үлгерген, бұл барлық қызметтің 70%-дан астамын құрайды.