CaspianLife, 26 желтоқсан. Кеше, 25 желтоқсан күні таңертең Azerbaijan Airlines әуе компаниясына тиесілі Embraer E190 ұшағы Ақтау қаласында апатқа ұшырады. Ұшақ Баку – Грозный бағытында рейс орындап келе жатқан. ҚР Төтенше жағдайлар министрлігінің (ТЖМ) мәліметінше, бортта Қазақстан, Ресей, Әзербайжан және Қырғызстан азаматтары болған, жалпы саны 69 адам, оның ішінде экипаждың бес мүшесі.
Қазақстан Республикасы Төтенше жағдайлар министрлігінің ақпараты бойынша, 25 желтоқсан күні сағат 11:00-де Azerbaijan Airlines әуе компаниясының Баку – Грозный бағытындағы ұшағының апатты жағдайы туралы ақпарат түскеннен кейін Ақтау әуежайы маңына ТЖМ-ның күштері мен құралдары дереу жіберілді.
Сағат 11:30-да ұшақтың әуежайдан үш шақырым қашықтықта апатқа ұшырағаны туралы хабар түсті. Апат салдарынан ұшақтың фюзеляжы екіге бөлініп (қалдықтардың арақашықтығы 300 м), пилоттар кабинасы маңында өрт шыққан.
Сағат 11:35-те құтқарушылар өртті сөндіру жұмыстарын бастап, оны сағат 12:05-те толықтай сөндірді. Апат орнындағы жалпы аумақ 4 200 шаршы метрді құрады.
Ұшақ бортында 67 жолаушы, оның ішінде бес экипаж мүшесі болған.
Апатты жою үшін барлығы 492 адамдық жеке құрам, 102 техника бірлігі, екі әуе көлігі және он кинологиялық топ жұмылдырылды:
- Төтенше жағдайлар министрлігі (ТЖМ),
- Ішкі істер министрлігі (ІІМ),
- Қорғаныс министрлігі (ҚМ),
- Ұлттық гвардия (ҰГ),
- Мемлекеттік емес өртке қарсы қызмет,
- ТЖМ-нің Апаттар медицинасы орталығы (ЦМК),
- Жедел медициналық көмек бригадалары және жергілікті атқарушы органдар,
- Астана қаласынан санитарлық авиация борты.
2024 жылғы 26 желтоқсан таңертеңгі жағдай бойынша оқиға орнында ұшақ конструкцияларын бөлшектеу жұмыстары жалғасуда. Апат салдарын жоюға 306 адам, 101 техника, екі әуе кемесі және алты кинологиялық есеп жұмылдырылды. Жұмыстарға ТЖМ, ІІМ, ҚМ ҰҰ қызметкерлері, сондай-ақ мемлекеттік емес өрт сөндіру қызметінің қызметкерлері, апат медицинасы орталығы, жедел медициналық жәрдем бригадалары және жергілікті атқарушы органдар, сонымен бірге Әзербайжан ТЖМ қатысуда.
ҚР ТЖМ Апат медицинасы орталығының бригадалары ұшақ апаты орнында авариялық-құтқару жұмыстарын медициналық қамтамасыз етуді жалғастыруда. Апат медицинасы орталығының психологтары Ақтауға келген туыстарына көмек көрсетуді жалғастыруда.
Ұшақ апатынан кейін, 25 желтоқсан күні авариялық-құтқару жұмыстары барысында 29 адам құтқарылып, Ақтау қаласының медициналық мекемелеріне жатқызылды, олардың ішінде үшеуі кәмелетке толмағандар. Қайтыс болған 38 адамның денелері табылып, сот-медициналық сараптама орталығына жеткізілді, олардың ішінде алтауы Қазақстан азаматы және үшеуі экипаж мүшелері. Жеті адамның денелері танылды. Сондай-ақ, 25 желтоқсанда ТЖМ іздеу тобы қара жәшікті тапты. Оқиға орнында тәулік бойы кезекшілік ұйымдастырылды.
Қазіргі уақытта Ақтау қаласында апат себептерін тергеу жөніндегі үкіметтік комиссия жұмыс істеуде.
Астана қаласындағы және Маңғыстау облысының ТЖД-дағы командалық орталықта жедел штабтар мен жедел желі телефондары жұмысын жалғастыруда.
8-7172-55-96-21,
8-7172-55-96-83,
8-7292-31-90-91.
Барлығы 1 063 қоңырау жедел желі телефондарына, шұғыл психологиялық көмек және ақпараттық сипаттағы мәселелер бойынша түсті.
Қазақстан Республикасының азаматтары арасындағы әуе апатында қаза тапқандар туралы мәлімет:
Төлесінов Сәндібек Екібайұлы, 16.11.1988 ж.т., туылған жері: Маңғыстау облысы, Жаңаөзен қаласының тұрғыны.
Жұмағұлов Бауыржан Жұмабайұлы, 30.09.1985 ж.т., туылған жері: Маңғыстау облысы, Жаңаөзен қаласының тұрғыны.
Махсудова Галина Растамбековна, 12.01.1978 ж.т., туылған жері: Маңғыстау облысы, Ақтау қаласының тұрғыны.
Шаймерденова Гаухар Жұмағатқызы, 17.07.1975 ж.т., туылған жері: Алматы қ., Астана қаласының тұрғыны.
Жұмағат Эльдар 23.08.2013 ж.т., Астана қ. тұрғыны.
Джутаева Салима Аманжолқызы, 21.02.1995 ж.т., туылған жері: Қостанай облысы, Қарағанды қаласының тұрғыны.
Сол күні ҚР премьер-министрінің баспасөз қызметі хабарлағандай, Үкімет қаулысымен Ақтау қаласы әуежайы маңында орын алған Az Airlines әуе компаниясына тиесілі Embraer 190 ұшағының апатының себептерін тергеу үшін үкіметтік комиссия құрылды. Тиісті қаулыға премьер-министр Олжас Бектенов қол қойды.
Комиссия құрамына Премьер-министрдің орынбасары Қанат Бозымбаев, Маңғыстау облысының әкімі, төтенше жағдайлар, көлік, сыртқы істер, ішкі істер, еңбек және халықты әлеуметтік қорғау, денсаулық сақтау министрліктерінің басшылығы, сондай-ақ бас көлік прокуроры енгізілді.
Комиссияға оқиға орнына дереу ұшып барып, ұшақтың апатқа ұшырау себептерін жан-жақты тергеуді қамтамасыз ету, қаза тапқандар мен зардап шеккендердің отбасыларына шұғыл көмек көрсету шараларын қабылдау тапсырылды.
«Қазақстан Үкіметі Әзербайжан Үкіметімен бірлесе отырып, болған оқиғаның себептерін жан-жақты тергеп-тексеру және шұғыл көмек көрсету бойынша тығыз ынтымақтастық жасауда», — делінген ҚР Премьер-министрінің баспасөз қызметі таратқан хабарламада.
ҚР ТЖМ баспасөз қызметінің мәліметінше, 26 желтоқсан таңертеңгі жағдай бойынша оқиға орнында ұшақ конструкцияларын бөлшектеу жұмыстары жалғасуда.
Апат салдарын жоюға 306 адам, 101 техника, екі әуе кемесі және алты кинологиялық топ жұмылдырылды. Жұмыстарға ТЖМ, ІІМ, ҚМ, Ұлттық ұлан қызметкерлері, сондай-ақ мемлекеттік емес өрт сөндіру қызметінің қызметкерлері, апат медицинасы орталығы, жедел жәрдем бригадалары мен жергілікті атқарушы органдар, сонымен қатар Әзербайжан ТЖМ қатысуда.
ҚР ТЖМ Апат медицинасы орталығының бригадалары ұшақ апаты орнында авариялық-құтқару жұмыстарын медициналық қамтамасыз етуді жалғастыруда. Апат медицинасы орталығының психологтары Ақтауға келген туыстарына көмек көрсетуді жалғастыруда.
Премьер-министрдің баспасөз қызметінің хабарлауынша, 26 желтоқсан таңертең Қазақстан Республикасы Үкіметі жанындағы құқық бұзушылықтардың алдын алу жөніндегі ведомствоаралық комиссия отырысында үкімет басшысы Олжас Бектенов күн тәртібінен тыс Премьер-министрдің орынбасары Қанат Бозымбаевтың Ақтау қаласы маңындағы әуе апаты орнындағы үкіметтік комиссия жұмысы туралы есебін тыңдады.
Құтқару қызметтері іздестіру жұмыстарын аяқтады. Ұшақ апаты салдарынан 29 адам ауруханаға жатқызылып, 38 адам қайтыс болды. Барлық зардап шеккендерге қажетті зерттеулер жүргізілді. Жағдайы тұрақтанғаннан кейін науқастар бейіндік бөлімдерге жатқызылып, толық көлемде ем қабылдауда. Сонымен қатар, санитарлық авиация желісі бойынша Астанадан Ұлттық шұғыл медицина орталығы мен жетекші республикалық орталықтардың жоғары білікті мамандары келді. Қазақстандық мамандардан бөлек, РФ ТЖМ арнайы борты мен Әзербайжан Республикасының санитарлық авиация бригадасы келді. Зардап шеккендер мен қаза тапқандардың туыстары келуде, оларға облыс әкімдігі тарапынан трансфер, орналастыру және тамақтандыру бойынша қажетті көмек көрсетілуде. Психологтар бригадалары жұмыс істеп жатыр.
Өз кезегінде, Қазақстан Республикасы Көлік министрлігі Әзербайжан Республикасының Үкіметімен бірлесіп жұмыс істеуде. Ертең (27 желтоқсан) Бразилияның авиациялық билігі мен Embraer компаниясының өкілдері келуі күтілуде. Түпқараған ауданында жергілікті ауқымдағы техногендік сипаттағы төтенше жағдай режимі енгізілді.
Қазақстан Президенті Қасым-Жомарт Тоқаевтың тапсырмасы бойынша зардап шеккендерге толық көлемде медициналық көмек көрсетілуде, қаза тапқандардың туыстары мен жақындарына қажетті қолдау шаралары көрсетілуде. Жедел желі телефон желілері жұмыс істеп тұр, мыңнан астам қоңырау түсті.
«Ең алдымен қаза тапқандардың туыстары мен жақындарына көңіл айтамын. Қазақстан Үкіметі мен уәкілетті органдар зардап шеккендерге және қаза тапқандардың туыстарына барлық қажетті қолдауды көрсетуде», — деп атап өтті Олжас Бектенов.
Сонымен қатар, Үкімет басшысы авиациялық қауіпсіздікті күшейту бойынша бірқатар тапсырмалар берді.
«Бұл қайғылы оқиға бізге де ұшу қауіпсіздігі бойынша белгілі бір шараларды қабылдау қажет екенін көрсетеді. Ең алдымен, жоспардан тыс тексеру жүргізіп, әуежайлар мен әуе кемелерінің техникалық жағдайын ерекше бақылауға алу қажет. Осы іс-шаралар аясында әуе компанияларымыздың экипаждарының біліктілігін, рұқсаттарын және кәсібилігін қайта тексеру керек. Әуе оқиғаларына жедел ден қою мақсатында авариялық-құтқару жұмыстарын жетілдіріп, мүдделі мемлекеттік органдардың үйлесімді жұмысын қамтамасыз ету қажет. Бұл жағдайдан дұрыс қорытынды шығарып, болашақта осындай жағдайлардың алдын алу үшін нақты ұсыныстар әзірлеу керек», — деп атап өтті Премьер-министр.
Маңғыстау облысы әкімдігінің баспасөз қызметінің 26 желтоқсан таңертеңгі мәліметіне сәйкес, ұшақ апатынан кейін Ақтау қаласының ауруханаларына жеткізілген барлық пациенттерге ҚР Денсаулық сақтау министрлігінің диагностика және емдеу хаттамасына сәйкес толық көлемде медициналық көмек көрсетілуде.
«Тергеу органдары екі пациенттің жеке басын анықтау бойынша жұмыс жүргізді, олардың бірі анықталды, Әзербайжан азаматтығы расталды», — делінген хабарламада.
Сонымен қатар, санитарлық авиация желісі бойынша Астанадан Ұлттық үйлестіру орталығының және жетекші республикалық орталықтардың жоғары білікті мамандары келді.
Жоғарыда аталған мамандардан бөлек, Ресей Федерациясы Денсаулық сақтау министрлігі мен ТЖМ-нің арнайы борты және Әзербайжан Республикасының санитарлық авиация бригадасы келді.
Барлық зардап шеккендерге тексеру жүргізіліп, емдеу тактикасы келісілді. Сондай-ақ, зардап шеккендер мен олардың туыстарымен психологтар бригадалары жұмыс істеуде.
Бүгін, 26 желтоқсан күні таңғы сағат 08:30-да Ақтау уақытымен Ресей Федерациясының ТЖМ орталық аппаратының санитарлық авиация борты Ресей азаматтарын эвакуациялады.
Қазіргі уақытта бақылауда 20 пациент бар, оның ішінде 6-уы жансақтау бөлімінде: 5-уі МОБ ЦОР-да, 1-еуі жансақтау бөлімінде. МОБ ЦОР-дан 2 пациент травматология бөліміне ауыстырылды.
Сурет: ҚР ТЖМ ресми сайты