Із-түзсіз жоғалған Тәжікстан азаматы 20 жылдан кейін Атыраудан табылды. Бобораджаб Джавлиев отбасының күн-көрісіне ақша таппаққа Мәскеуге аттаныпты. Алайда бір жыл бұрын ес-түссіз жатқан күйінде атыраулық Леонтий Демяшевтің көзіне түседі. Өкінішке қарай, мұнда қайдан, қалай жеткенін есіне түсіре алмаған.
– Мен мұнда тек ақша тауып, кері үйіме қайтамын деп келдім. Бірақ отбасыма хабарласа алмадым. Көмектесетін таныстарым да болмады. Барлық құжатымды жоғалтып алдым. Көп нәрсе айтқым келеді, бірақ ұмытып қала беремін. Мәскеуде жүріп басымнан соққы алғандықтан есте сақтау қабілетім нашарлап кетті, – дейді жоғалып-табылған мигрант Бобораджаб ДЖАВЛИЕВ.
Бобораджаб осы уақытқа дейін Леонтийдің саяжайын паналап келген. Демяшовтар отбасы оның денсаулығын қалыпқа келтіріп, аяққа тұруына көмектесіпті. Өздері «Баха» деп ат қойып, туыстарын табуға жұмыстанып. «Тәжікстан» газетінің редакциясына хабарлама берген көрінеді. Кейін белгілі болғандай, оның ағайын-туысы мен отбасы Душанбеден табылған.
– Ең бастысы, оның құжаттарын жасақтатып, отбасымен қауышқаны қажет. Тілегім сол. Мен де, әйелім де үйренісіп қалдық. Бауыр басып кеттік. Не істей аламыз, солай болды. Өмір ғой. Туыстарын тауып берем деп уәде бергем, уәдемде тұрдым, – деп ағынан жарылды Атырау қаласының тұрғыны Леонтий ДЕМЯШЕВ,
Қазір Бобораджаб Джавлиев қаладағы арнайы орталыққа орын ауыстырды. Құжаттары реттелгенше осында бола тұрады. Ал оны қалыпқа келтіру үшін әлі бір айдай уақыт қажет. Әзірге Баха мен оның отбасын екі мың шақырым бөліп тұр. 20 жылғы сағыныш, айтылмаған әңгіме де кеудесін кернеп тұрғандай. Оның қазіргі бар арманы да, қалауы да Душанбеге жетіп, жақындарымен қауышу.
