Қарағанды облысындағы Костенко шахтасында қаза тапқан соңғы кеншінің денесі 30 қазанда таңертең табылып, іздеу жұмыстары аяқталды.
Бұл ақпаратты қарағандылық журналист Айнұр Балакешова марқұм кенші Сергей Киселевтің туыстарына сілтеме жасап хабарлады. Сергей Киселев Костенко шахтасындағы апаттан қаза тапқан кеншілердің соңғысы болды.
«Әкеміздің денесі ең соңғысы болып табылды. Ол 35 жылдан астам кенші болып жұмыс істеген еді», — дейді Сергей Киселевтің балалары.
Соңғы кеншіні іздеу жұмысы түні бойы жүргізілген. Төтенше жағдайлар министрлігі мен Қарағанды облысы әкімдігінің баспасөз қызметтері қаза тапқан соңғы кеншінің табылғаны туралы ресми хабарлама жариялаған жоқ.
Бұған дейін Костенко шахтасында қаза тапқан 45 кеншінің мәйіті табылған болатын.
