CaspianLife. 13 қазан. Атырау мұнай өңдеу зауытының санитариялық-қорғау аймағы 160 гектарға кеңейтіледі. Жаңа шекараға шамамен 122 үй кіреді. Олардың тұрғындарын басқа жерге көшіру және өтемақы төлеу жоспарланып отыр. Бұл туралы «ҚазМұнайГаз» компаниясының еншілес кәсіпорны — Атырау мұнай өңдеу зауытының (АМӨЗ) мәліметіне сілтеме жасаған «Курсив» басылымы хабарлады.
Аймақтың шекарасы қайта қаралғаннан кейін санитариялық-қорғау аймағының жалпы аумағы 965 гектарды құрайды.
«Тұрғындарды көшіруге қатысты мәселелермен Атырау қаласының әкімдігі айналысады», — делінген зауыттың ақпараттық порталдың сауалына берген жауабында.
Өтемақы мөлшері жылжымайтын мүлікті бағалау нәтижесі бойынша анықталады. Бағалауды әкімдік таңдайтын тәуелсіз лицензияланған бағалау компаниясы жүргізеді.
Тұрғындарға көшу тәртібі, баспана таңдау және рәсімдердің мерзімі туралы сұрақтар бойынша жергілікті әкімдікке жүгіну ұсынылды. Тұрғындар көшірілгеннен кейін зауыт санитариялық-қорғау аймағының аумағын көгалдандыруды жоспарлап отыр.
Қазіргі уақытта Атырау облысының әкімдігі тұрғындарды көшіруге жұмсалатын шығындарды есептеп жатыр. Жалпы сома белгілі болғаннан кейін компания мемлекеттік органдармен бірлесіп, қаржыландыру көздерін айқындайды.
Өтемақы төлеу шығындарын өтеу үшін АМӨЗ қызметтерінің тарифтері көтеріле ме деген сұраққа зауыттың баспасөз қызметі нақты жауап бермеді.
Сонымен қатар АМӨЗ мұнай өңдеу көлемін арттыру жоспары туралы мәлімдеді. Кәсіпорынның жобалық қуаты күрделі жөндеуге бөлінген 35 күнді ескергенде, жылына 5,5 млн тонна мұнай өңдеуге есептелген. Ал 2026 жылдың қорытындысы бойынша зауыт 5,7 млн тонна шикі мұнай өңдеуді жоспарлап отыр.
Өңдеу көлемін арттыруға бастапқы өңдеу қондырғыларындағы жөндеу мерзімін қысқарту, сондай-ақ екінші реттік өңдеу қондырғыларында сатып алынатын жеңіл шикізат — пентан-гексан фракциясын пайдалануға мүмкіндік береді.
Дереккөз: «Курсив»
Фото: primeminister.kz