CaspianLife, 28 қаңтар. 2024 жылғы 12 қарашада Баку қаласында өткен COP-29 халықаралық климаттық форумы аясында Қазақстан Республикасы Үкіметі мен Қытай Халық Республикасы Үкіметі арасында жаңартылатын энергия көздері саласындағы жобаларды іске асыру туралы келісімге қол қойылды. Бұл құжат екі ел арасындағы «жасыл» және тұрақты энергетика бағытындағы стратегиялық әріптестікті жаңа деңгейге көтереді.
Келісімнің негізгі мақсаты – ұзақ мерзімді әрі өзара тиімді ынтымақтастықты дамыту, энергия өндіру мен жинақтаудың заманауи технологияларын енгізу, сондай-ақ Қазақстан өңірлерінің тұрақты әлеуметтік-экономикалық дамуына ықпал ету.
Құжат аясында жалпы орнатылған қуаты 1,8 ГВт болатын жаңартылатын энергетика саласындағы үш ірі инвестициялық жобаны жүзеге асыру көзделіп отыр. Атап айтқанда, жиынтық қуаты 1,5 ГВт болатын екі жел электр станциясы және қуаты 300 МВт болатын бір күн электр станциясын салу жоспарланған. Бұл жобалар мемлекетаралық ынтымақтастық шеңберінде Қазақстанда жүзеге асырылып жатқан ЖЭК саласындағы ең ауқымды бастамалардың қатарына жатады.
Жобаларды Павлодар, Қарағанды және Түркістан облыстарының аумағында іске асыру жоспарлануда. Өңірлердің таңдалуы жел және күн ресурстарының жоғары әлеуетімен, сондай-ақ жаңа генерациялайтын қуаттарды Қазақстанның Бірыңғай электр энергетикалық жүйесіне интеграциялау мүмкіндігімен байланысты.
Барлық жобалар қажетті энергетикалық инфрақұрылымды дамытуды, соның ішінде электр желілеріне қосылу объектілерін салуды және электр энергиясын жинақтау жүйелерін енгізуді қамтиды. Жобаларды іске асыруға салынатын инвестициялардың жалпы көлемі 2,2 млрд АҚШ долларын құрайды. Қаржыландыру халықаралық қаржы институттары мен банктердің қатысуымен жүзеге асырылмақ, бұл инвесторлардың Қазақстанның энергетика секторына деген жоғары сенімін көрсетеді.
Жобалардың әлеуметтік-экономикалық әсері де айтарлықтай болмақ. Атап айтқанда, шамамен 2 мың уақытша және 204 тұрақты жұмыс орны ашылады, сондай-ақ экономиканың сабақтас салаларының дамуына серпін беріледі.
Экологиялық тұрғыдан алғанда, жаңа нысандар жыл сайын 5,7 млрд кВт·сағаттан астам «жасыл» электр энергиясын өндіруге мүмкіндік беріп, көмірқышқыл газының шығарындыларын жылына 4,5 млн тоннаға дейін қысқартуға ықпал етеді. Бұл Қазақстанның климаттық міндеттемелері мен көміртегі бейтараптығына қол жеткізу жөніндегі мақсаттарына сай келеді.
Сонымен қатар жобаларға «Самұрық-Энерго» АҚ-ның қосалқы инвестор ретінде қатысуы ұлттық мүдделердің ескерілуін, сондай-ақ жаңартылатын энергетика саласындағы отандық мамандардың біліктілігін арттыруды қамтамасыз етеді.
Қазіргі таңда жобалар жобалық-іздестіру жұмыстарынан бастап негізгі инвестициялық және шарттық құжаттарды дайындау кезеңіне дейінгі әртүрлі іске асыру сатыларында тұр. Осыған байланысты аталған келісімді ратификациялау ірі инвестициялық жобаларды жүзеге асыру үшін қажетті құқықтық негіз қалыптастырады.
Осы орайда Үкімет Қазақстан Республикасы мен Қытай Халық Республикасы арасындағы жаңартылатын энергия көздері саласындағы жобаларды іске асыру туралы келісімді ратификациялау жөніндегі заң жобасын қолдауды сұрап отыр.
(Сурет: ЖИ көмегімен)