CaspianLife, 29 тамыз. Атырау қаласының №2 сотында азаматша С.-ға қатысты 49 жәбірленушінің ақшасына ірі көлемде бірнеше рет алаяқтық жасағаны үшін (ҚК 190-бабының 3-бөлігінің 1, 3, 4-тармақтары – «Алаяқтық») қылмыстық іс қаралды.
№2 соттың хабарлауынша, айыпталушы жәбірленушілердің ақшасын иемдену мақсатында өзінің Instagram парақшасында қайырымдылыққа қаражат жинауды жарнамалаған, сондай-ақ әртүрлі тауарларға қатысты «жеңіліссіз» лотерея ұйымдастырған.
«Жәбірленушілер блогерге сеніп, лотереяға қатысу үшін оның банк шотына ақша жіберген. Ал айыпталушы жәбірленушілердің 13 миллион теңгеден астам ақшасын өз қажетіне жұмсаған», – делінген соттың баспасөз хабарламасында.
Сонымен қатар, азаматша С.-ның кінәсі өз жауабымен, жәбірленушілер мен куәгерлердің айғақтарымен, бейнежазбалармен, хат алмасу скриншоттарымен, банк шоттарынан алынған үзінділермен дәлелденген.
Сотта прокурор айыпталушыға рақымшылық актісін қолдана отырып, 3 жыл 1 ай 10 күнге бас бостандығынан айыру жазасын тағайындауды сұрады. Айыпталушы өз кезегінде кінәсін ішінара мойындап, бас бостандығынан айырмайтын жаза тағайындауды өтінді.
Сот айыпталушы С.-ның төрт кішкентай баласының барын жеңілдететін мән-жай ретінде ескерді, ал ауырлататын мән-жай анықталған жоқ. №190-баптың 3-бөлігі (Алаяқтық) 3 жылдан 7 жылға дейінгі мерзімге бас бостандығын шектеу немесе бас бостандығынан айыру жазасын қарастырады.
Сот үкімімен айыпталушы кінәлі деп танылып, оған 4 жыл 8 айға бас бостандығынан айыру жазасы тағайындалды. Сонымен қатар, оған 5 жыл мерзімге бұқаралық ақпарат құралдарын және телекоммуникация желілерін қоса алғанда, қоғамдық қызметпен айналысуға тыйым салынды.
Рақымшылық актісінің негізінде жазаның мерзімі үштен бірге қысқартылып, түпкілікті жаза – 3 жыл 1 ай 10 күн бас бостандығынан айыру болып белгіленді. Жәбірленушілердің азаматтық талаптары толық көлемде қанағаттандырылды. Үкім заңды күшіне енген жоқ.