CaspianLife. 30 қазан. 2026 жылғы егін жинау науқанының қорытындысы бойынша Қазақстанда 24,3 миллион тонна астық жиналды. Ауыл шаруашылығы министрлігінің баспасөз қызметінің мәліметінше, бұл – соңғы 15 жылдағы ең жоғары көрсеткіштердің бірі. Осы кезеңде жалпы астық түсімі бұдан да жоғары болған екі рекордтық жыл тіркелген.
«Науқанның маңызды нәтижесі – жиналған өнімнің көлемі ғана емес, оның сапасы да. Алдын ала мәлімет бойынша, элеваторларға тапсырылған жұмсақ бидайдың шамамен 72 пайызы үшінші класқа жатады. Зерттелген сынамалардың 48 пайызында желімтік мөлшері 28 пайыздан асады. Ақмола облысында үшінші класты бидайдың үлесі 90 пайызға, ал Hi-Pro санатындағы бидайдың үлесі 70 пайызға жетеді», – деп хабарлады министрлік.
Экспортта да оң динамика байқалады. Соңғы екі маркетингтік жылда Қазақстан астық пен ұнды астық баламасымен есептегенде тиісінше 15,5 миллион және 16 миллион тонна көлемінде экспорттаған. Ведомство бұл көрсеткіштерді «ел тәуелсіздік алған жылдардағы рекордтық нәтиже» деп бағалап отыр.
«Қазақстан темір жолы» мәліметінше, 2026 жылғы қыркүйектен 19 қазанға дейін астық экспорты 1,657 миллион тоннаны құрады. Бұл өткен жылдың сәйкес кезеңімен салыстырғанда 9 пайызға көп.
«Соңғы үш жылда минералды тыңайтқыштарды енгізу көлемі үш есеге жуық артып, 2025 жылы 1,8 миллион тоннаға жетті. 2026 жылы жоспарланған 2,3 миллион тоннаның 2,1 миллион тоннасы қазірдің өзінде енгізілді. Элиталық тұқымдардың үлесі 12 пайызға жетті. Бұл ауыл шаруашылығы өнімдерінің өнімділігі мен сапасын одан әрі арттыруға мүмкіндік береді», – деп мәлімдеді Ауыл шаруашылығы министрлігі.
Егін жинау жұмыстарына 130 мыңнан астам трактор, 29 мың астық жинайтын комбайн, 17 мың жатка және ауыл шаруашылығына арналған өзге де 130 мыңға жуық техника жұмылдырылды.
Дереккөз: Forbes.kz