CaspianLife, 16 сәуір. Атырау темір жол вокзалын қайта жаңғырту жұмыстары басталады
«Қазақстан темір жолы»ҰҚ» АҚ тапсырысымен Атырау теміржол вокзалын қайта жаңғырту жұмыстары жүргізіледі.
Өңірлік коммуникациялар қызметі баспасөзінің хабарлауынша, мердігер мекеме –«БАТЫСАЛЬЯНССТРОЙ» ЖШС. Бұл жұмыстар 2025 жылдың сәуірінде басталады.
— Биыл облыс орталығынан бөлек Исатай, Аққыстау, Доссор, Мақат, Жамансор, Мұқыр, Сағыз және Құрманғазыдағы теміржол вокзалдарына күрделі жөндеу жұмыстары жүргізіледі. Оның ішінде Сағыз және Доссор вокзалын жаңадан салу жоспарланып отыр. Қазіргі таңда келісім-шарт жасақталды. Жалпы нысанның жөндеу жұмысы республикалық бюджет есебінде болса, абаттандыру секілді шаралар жергілікті бюджет арқылы жүзеге асады. Жұмыстар жыл аяғына дейін аяқталады деп жоспарланып отыр,-деді Атырау облысы әкімінің орынбасары Қайрат Нұртаев.
Қайта жаңғыртуға мүгедектердің қол жетімділігін қамтамасыз ету, халыққа қызмет көрсетуге және жақсартуға бағытталған негізгі құралдармен жабдықтау, сыртқы және ішкі жұмыстар толықтай кіреді.
Айта кетейік, Атырау теміржол вокзалы күрделі жөндеуден соңғы рет 2015 жылы өткен. Мұндағы тәуліктік жолаушы саны 1300 адамды құрайды.