CaspianLife, 15 ақпан — Атырау облысында жанармай таситын көліктің 27 жастағы жүргізушісі жоғалып кетті.
Облыстық төтенше жағдайлар департаменті баспасөз қызметінің ақпаратына қарағанда, «Урал» көлігінің жүргізушісі 12 ақпанда кен орнына бару үшін жолға шығып кеткен.
«Бірақ, Атырау қаласынан жолға шыққан жүргізушінің Мақат ауданындағы «Қаратал» кен орнына жетпегені анықталып отыр. Бұл туралы департаменттің диспетчерлік пультіне бүгін, 14 ақпанда сағат 01:30-да хабар түсті. Көлік жүргізушісінің жасы – 27-де. Ол «Арна» ЖШС-де жанармай таситын «Урал» көлігін жүргізуші болып жұмыс істейді. Оны іздестіру жұмыстары бүгін, 14 ақпанда түнде басталды», -деп хабарлады департаменттің баспасөз қызметі.
Жоғалған жүргізушіні іздестіруге түнде №8 өрт сөндіру бөлімінен 3 қызметкері мен 1 «УАЗ» көлігі мен туыстары жұмылдырылды. Ал, таңертең сағат 06:20-да іздестіру жұмыстарына жедел-құтқару жасағының құтқарушылары, қосымша техника және жоғалған азаматтың туыстары қосылды.
«Іздестіру жұмыстары Мақат ауданындағы Доссор кентінен 40 шақырым жерде жалғасып жатыр. «Қаратал» кен орнына жақын маңда әуеден іздестіруге шешім қаблыданды. Сол себептен, оған «Қазавиақұтқару» АҚ-на қарасты МИ-8 тікұшағы экипажының 4 мүшесі, төтенше жағдайлар департаментінің 3 қызметкері, туыстарынан 3 адам тартылды. Әзірге іздестіру жұмыстары нәтиже берген жоқ», -деп мәлім етті департаменттің баспасөз қызметінен.
Облыстық төтенше жағдайлар департаменті баспасөз қызметінің мәліметінше құтқарушылар жанармай таситын көлігімен жоғалып кеткен жүргізушіні 14 ақпанда жергілікті уақытпен сағат 17:12-де Мақат ауданындағы Доссор кентінен тапқан.
Жүргізушінің айтуынша, жолда көлігі бұзылып, Доссор кентіне жаяу жеткен. Денсаулығы қалыпты, медициналық көмекті қажет етпеген.
Фото: Qazaqstan TV
