CaspianLife, 11 тамыз — Коронавирусқа қарсы вакцина алған атыраулық тұрғын туған күнінде 200 мың теңге ұтып алды. 11 тамызда Атырауда «Вакцина ал да, ұтысқа ие бол!» акциясының төртінші кезеңі өтті.
Ұтыс ойыны қорытындысымен 10 жеңімпаз анықталды. Олардың әрқайсысы 200 мың теңгелік сертификатқа ие болды.
Жеңімпаздардың бірі — Атырау қаласының тұрғыны Нұрлан Қуанышев. Төрт баласы бар әкенің бүгін туған күні көрінеді. Ол «Спутник V» вакцинасының І компонентін алған. Осылайша, ақшалай ұтысқа ие болып, өз туған күнінде қуанышқа бөленді.
«Мен вакцинаны 6 тамыз күні Атырау қалалық №7 — ші емханада алдым. Туған күнімде ұтыс иесі атанамын деген ой болған да жоқ. Менің жақындарым бұл қуанышты хабарды мерекелік дастархан басында естіп, қатты қуанып отыр», — дейді жеңімпаз.
Нұрланмен бірге ақшалай ұтыс иесі атанғандардың қатарында облыстың тағы да тоғыз тұрғыны бар. Атап айтсақ:
— Лариса Долда, Атырау;
— Айсұлу Бисенғалиева, Еркінқала ауылдық округі (Атырау);
— Болат Ерғалиев, Құрманғазы ауданы;
— Тимофей Турко, Атырау;
— Сымбат Кудияр, Атырау;
— Асқар Қыстаубаев, Атырау;
— Ғайни Әзмағамбетова, Атырау;
— Байқоныс Сәрсенбаев, Атырау;
— Дидар Есенұлы, Атырау.
Еске салсақ, Атырау облысы Азаматтық Альянс ұйымы ұйымдастырған ұтыс ойыны 30 қыркүйекке дейін жалғасады. Жүлденің жалпы қоры — 40 миллион теңге.