CaspianLife. 9 шілде. 8 шілдедегі жағдай бойынша Қазақстанның негізгі экспорттық мұнай сұрпы – CPC Blend маркалы мұнайдың бағасы барреліне 77,93 АҚШ долларын құрады. Бұл туралы OilPrice.com порталы хабарлады. Салыстыру үшін айтсақ, әлемдік эталон саналатын Brent маркалы мұнайдың бағасы барреліне 78,39 АҚШ долларына жетті. Осылайша екі мұнай сұрпының арасындағы айырмашылық небәрі 46 центті құрады.
Сарапшылардың айтуынша, бұған дейін қазақстандық мұнай Brent бағасынан едәуір төмен бағамен сатылып келген. Оған тасымалдау тәуекелдері, Ормуз бұғазы маңындағы геосаяси шиеленіс және әлемдік нарықтағы белгісіздік себеп болған. Алайда қазіргі таңда баға айырмашылығының айтарлықтай қысқаруы CPC Blend құнының әлемдік эталон деңгейіне барынша жақындағанын көрсетеді.
Reuters агенттігінің мәліметінше, Brent мұнайының қымбаттауы Таяу Шығыстағы жағдайдың қайта шиеленісуімен байланысты. АҚШ пен Иран арасындағы қарым-қатынастың ушығуы және Ормуз бұғазы арқылы өтетін теңіз тасымалына төнген қауіптің артуы аясында әлемдік мұнай бағасы 6 пайыздан астам өсті. Бұл жағдай Қазақстан үшін де ерекше маңызға ие.
CPC Blend – Теңіз, Қарашығанақ және Қашаған сияқты еліміздің ірі кен орындарынан өндірілетін мұнайдың негізгі экспорттық сұрпы. Егер қазақстандық мұнай Brent бағасына жақын деңгейде сатылатын болса, бұл мұнай экспортынан түсетін ел кірісінің артуына оң әсер етуі мүмкін.
Сонымен қатар сарапшылар мұнай нарығындағы жағдайдың әлі де құбылмалы екенін атап өтеді. Brent бағасының өсуіне қарамастан, CPC Blend құны бір күн ішінде 5,7 пайызға төмендеген. Сондықтан мұнай бағасындағы қазіргі ең төменгі айырмашылықтың сақталуы Ормуз бұғазындағы ахуалдың одан әрі қалай өрбитініне, теңіз тасымалының қауіпсіздігіне және әлемдік мұнайға деген сұранысқа байланысты болмақ.