CaspianLife, 25 маусым. Екі жылдан астам уақыт бойы тағдыры бүкіл Қазақстанды алаңдатқан Ербаян Мұхтар 23 маусым күні сағат 21:40-та Астанадағы Ұлттық шұғыл медицинаны үйлестіру орталығында көз жұмды. Денсаулық сақтау министрлігінің мәліметінше, өлімнің тікелей себебі ауыр бас-ми жарақатының салдарынан дамыған көп ағзалық жеткіліксіздік синдромы болған.
Жас жігіт жарақатты Ұлттық ұланның әскери бөлімінде қызмет етіп жүрген кезінде алған. Әскерилердің ресми нұсқасы бойынша, ол дәретханада құлап, басын кафель еденге соққан. Алайда отбасы алғашқы күннен бастап ұлдарының аяусыз соққыға жығылғанын айтып келеді. 2023 жылдың желтоқсанында Ербаян комаға түскен. Бас әскери прокуратура 2024 жылдың жазында әскери қызметшілер арасындағы жарғылық емес қарым-қатынас фактісі бойынша тергеу жүргізіліп жатқанын растаған болатын. 2026 жылдың мамыр айының соңында ол шұғыл түрде Астанаға жеткізілгенімен, дәрігерлер оның өмірін сақтап қала алмады.
– Өкінішке қарай, кеше науқастың жағдайы күрт нашарлап, жүрек қызметі тоқтады, – деді орталық басқармасының төрағасы Ержан Әділбеков. Оның айтуынша, Ербаян жансақтау бөлімінде тұрақты бақылауда болып, қажетті ем-домның барлығын алған, ал туыстары оған күн сайын кіріп тұрған.
Алайда Ербаянның әкесі Хамит Аймағамбетов ресми мәліметке күмәнмен қарайды. Оның сөзінше, отбасы ұлдарының қайтыс болғанын телефон арқылы естіген, ал олар ауруханаға жеткен кезде аппараттар өшіріліп қойған. Марқұмның туысы Самат Мұстафин де өмірді қамтамасыз ететін құрылғыларды ажыратуға ешкімнен келісім сұралмағанын айтты. Оның пікірінше, заң бойынша мұндай жағдайда туыстардың келісімі қажет. Сол түні Ербаянның анасы мен ағасы журналистерге оның әлі тірі екенін, бірақ аппаратқа қосылмағанын хабарлаған. Кейінірек туыстары оның қайтыс болғанын растады.
Ербаянның еміне қолдау көрсету үшін қазақстандықтар шамамен 230 миллион теңге жинаған. 2025 жылы ол Түркияда екі рет ем қабылдаған. Ел болып оның сауығып кетуіне үміт артқан еді.