CaspianLife, 3 қыркүйек. Мемлекет басшысы Қасым-Жомарт Тоқаев 2024 жылдың 6 қазанында республикалық референдум өткізу туралы № 636 Жарлыққа қол қойды.
Жарлық Қазақстан Республикасының Президентінің сайтында жарияланды. Онда Қазақстан Республикасының Конституциясының 44-бабының 10-тармақшасы мен Қазақстан Республикасының «Республикалық референдум туралы» Конституциялық заңының 18-бабына сәйкес Мемлекет басшысы мынадай шешім қабылдады:
2024 жылдың 6 қазанында республикалық референдум өткізу.
Республикалық референдумға мынадай сұрақты қою: «Сіз Қазақстанда атом электр станциясын салумен келісесіз бе?».
Бұл Жарлықты бұқаралық ақпарат құралдарында 2024 жылдың 3 қыркүйегінде ресми жариялау.
Республикалық референдумды ұйымдастыру мен өткізу міндетін Қазақстан Республикасының Орталық сайлау комиссиясына, референдумның Орталық комиссиясының функцияларын атқаратын комиссияға, сондай-ақ аумақтық және учаскелік сайлау комиссияларына жүктеу, олар референдумның аумақтық және учаскелік комиссияларының функцияларын орындайды.
Қазақстан Республикасының Үкіметі Орталық сайлау комиссиясымен, басқа да орталық мемлекеттік және жергілікті атқарушы органдармен бірлесе отырып, республикалық референдумды ұйымдастыру мен өткізу үшін қажетті шараларды қабылдауы тиіс.
Бұл Жарлық қол қойылған күнінен бастап күшіне енеді.
