CaspianLife, 19 наурыз — Исатай ауданында 15 сайлау учаскесі жұмыс істеп тұр. Мұндағы сайлаушылардың жалпы саны — 15815, деп хабарлайды CaspianLife.
ҚР парламенті мәжілісінің және түрлі деңгейдегі мәслихаттың депутаты атанғысы келетін 47 кандидат тіркелген. Қамысқала ауылындағы №128 сайлау учаскесінде 1297 сайлаушы бар. «Оңтүстік шығыс Новобогат» кен алаңында ауысымдық қызметте жүрген 84 адам осы учаскеде дауыс бермек. Аудандық аумақтық сайлау комиссиясының мәліметінше, түрлі себеппен өзге облыстардан, Атырау қаласынан және аудандардан келіп, осында жүрген 346 тұрғынның да өз таңдауын жасауына мүмкіндік берілген. Саяси науқанның жүру барысы – байқаушылардың жіті назарында.
«Бүгінгі сайлаушылардың белсенділігі өте жоғары, мен өзім бірнеше жыл қатарынан тәуелсіз байқаушы қызметін атқарып келемін. Тәуелсіз байқаушылардың басты артықшылығы біз ешқандай кадидат, партия үшін болыспаймыз сол себепті біздің жауапкершілікте өте үлкен. Тағы бір миссиямыз сайлау учаскелерінде сайлау заңнамаларына қайшы келетін әрекеттерді болдырмау» — деді «Дауыс» қоғамдық байқаушылар коалициясы АОФ өкілі Эдьмира Әмірова.
Еліміз үшін маңызды саяси науқанда дауыс берушілерге мерекелік көңіл-күй сыйлау үшін мәдени-көпшілік іс шара ұйымдастырылған. Исатай аудандық балалар мен жасөспірімдер спорт мектебінің тәрбиеленушілері сайлау учаскесінің алдында таэквондоның әдіс -тәсілдерін көрсетті. Сонымен қатар бишілер де өнер көрсетті.
