CaspianLife, 4 желтоқсан — Сырым Датов көшесінің тағы бір бөлігі қолданысқа берілді, деп хабарлайды Caspian Life.
Қала әкімдігінің баспасөз қызметінің хабарлауынша, Сырым Датов көшесін қайта жаңғырту мақсатында Баймұханов көшесінен Құттығай батыр көшесіне дейінгі жалпы ұзындығы 1,5 шақырым тас жол пайдалануға берілді.
Айта кетейік, аталмыш көше қайта жаңғыртылу үшін шілде айында жабылған болатын. Төрт жолақты жолдың жалпы ұзындығы 4,69 шақырымды құрайды. Атап айтсақ, жол жөндеу жұмыстары бірінші аумақ — “Азаттық даңғылынан бастап Қиғаш көшесіне” дейін, екінші аумақ — “Баймұханов көшесінен Абдрахманов көшесіне” дейінгі аралықты қамту жоспарланған еді.
Жол құрылысын «Атырауинжстрой» мердігер мекемесі жүргізуде.
Қалалық тұрғын үй коммуналдық шаруашылығы мамандарының айтуынша, жаңғырту жұмыстары кезінде толықтай жолдың астыңғы қабаттары алынады. Сондай-ақ, жоба шеңберінде жаяу жүргінші жолы, 8 ашық және 4 жабық аялдама, заманауи көше жарық шамдарын орнату көзделген.
