CaspianLife, 22 қараша — Атырау облысында 261 учаске бар болса, оның 117-сі облыс орталығында орналасқан. Шаһардағы барлық учаскелер өз жұмыстарын бүгін сағат 07:00-де бастады. Бұл туралы қала әкімдігінің баспасөз қызметі хабарлады.
Учаскелік сайлау комиссияларының төрағалары атап өткендей, қала тұрғындары таңның атысымен өз таңдауын жасау үшін белсенді түрде келуде. Ел тарихындағы елеулі оқиғаға бейжай қарамай, өз дауысын беруге келген қала тұрғындарының көңіл-күйі жақсы.
“Бүгін еліміз үшін маңызды күн. Сайлауға өз дауысымды беруге келдім. Халқымыз үшін, елдің амандығы үшін таңдауымды жасадым. Жер бетінде ешқандай соғыс болмасын, сайланған президентіміздің әр қадамы құтты болып, елімізге бақыт әкелсін! Көңіл-күйім өте жақсы” — дейді қала тұрғыны Сембай Аренжанов.
Айта кетейік, аймақта 228 196 сайлаушы тіркелген. Сағат 12:00-дегі жағдай бойынша 39,05 пайыз қала тұрғыны дауыс берген. Дауыс беру үшін сайлаушылар өздерімен бірге жеке басын куәлатындыратын құжаты болу керектігін еске саламыз. Дауыс беру кешкі 20:00-ге дейін жалғасады.
