Ералы Тоғжанов COVID-19-ға қарсы міндетті вакцинация туралы айтты — CaspianLife ақпараттық порталы

Ералы Тоғжанов COVID-19-ға қарсы міндетті вакцинация туралы айтты

Оқи отырыңыз...

CaspianLife, 23 маусым — Ұсынылып отырған міндетті вакцинация іс жүзінде вакцинацияланбаған адамдар дискриминациясына әкеледі деген пікір бар. Осыған қатысты не айтасыз? Бұл вакцинация паспорттарын, ПТР тесттерді және т.б. қолдан жасаудың өсуіне себеп болады деп ойламайсыз ба? Бұл Орталық коммуникациялар қызметі алаңында өткен брифингте қойылған сұрақтар. Журналистердің сауалына премьер-министрдің орынбасары Ералы Тоғжанов жауап берді. 
 Оның айтуынша, мұндай мәселе жаңашылдықтар енгізілгенде пайда болады.

«Бұл мәселе үнемі көтеріледі. Біз ПТР-сынамаларды енгізген кезде де конституциялық құқықтар мәселесі көтерілді, бірақ, бірінші кезекте, Конституцияның 29-бабы бойынша еске салып өтейін, біз азаматтарымыздың денсаулығының қауіпсіздігін қамтамасыз етуге міндеттіміз! Сондықтан, қабылданып жатқан бұл шаралар барлық азаматқа емес, тек қызмет көрсету саласына ғана: күн сайын көптеген азаматпен байланысатын адамдарға қатысты, дәл осы санаттағы адамдар қызмет алуға келгендерге үлкен қауіп төндіруі мүмкін. Қызмет көрсету саласы — үлкен бағыт. Бұл бір жағынан ШОБ-қа да қатысты, яғни олардың жұмысы тоқтамайды, «Атамекен» ҰКП мен бизнес тарапынан да үлкен өтініш болды, біз оларды қолдадық. Сондықтан осындай шешім қабылданды. Бұл жерде мен конституциялық құқықтардың бұзылуын көріп отқан жоқпын, оның үстіне, біз таңдауға мүмкіндік береміз. Егер қарсы көрсетілімдер болса, бас тартатын адамдардың санаты бар, онда олар ПТР-тест тапсыруы тиіс. Біз қауіп төндіруге жол бере алмаймыз, әсіресе Үндістан мен көрші елдерде болып жатқан жағдайларды ескерсек», — деді вице-премьер Үкіметтің ұстанымын жеткізе отырып.

Вакцинация паспорттарын қолдан жасауға келетін болсақ, Тоғжанов мұндай алаяқтарға қатысты қатаң шаралар қолданылатынын жеткізді. Бұл мәселе министрлер кабинеті мен құқық қорғау органдарының бақылауында дейді ол.