Өткен тәулікте АҚШ-та 210 мыңнан астам адамнан коронавирус анықталды. Бұл – індет басталғаннан бері тіркелген абсолютті рекордтық көрсеткіш.
Америка бұл дерттен көз жұмғандар бойынша да алда келеді. Жалпы қаза тапқандар саны 280 мыңнан асады. Инфекцияның таралуының алдын алу шаралары айтарлықтай нәтиже бермеген. Халықтың ендігі үміті – вакцинада. «Модерн» биотехнологиялық компаниясы екпенің 125 миллион дозасын өндіруді жоспарлап отырған көрінеді. Оның көп бөлігі АҚШ-қа арналған.
Майк Пенс, АҚШ вице-президенті
Біз «Warp Speed» операциясының басталғанын жариялаймыз. Оның мақсаты – қажетті жағдайларда сақталған вакцинаны дәрігерлер мен науқастарға уақытылы жеткізіп отыру. Бұл жерде біз логистикаға мамандандырылған компаниялармен бірге жұмыс істейміз. Препаратты тиеп, қажетті орынға жеткізуді мақұлдағаннан кейін жұмысқа кірісеміз.
Ақүй өз кезегінде шектеу шараларын қатаңдатуды қолға алды. Пандемиямен күрес жөніндегі кеңестің үйлестірушісі Дебора Брикс америкалықтарды көшедегі, үйдегі жиындардан бас тартып, ашық ауада да бетперде тағып жүруге шақырды. Пандемия басталғалы бері әлемде 65 миллионнан астам адам коронавирус жұқтырған.