Caspianlife, 6 қазан. Батыс Қазақстан облысының шекарасында 84,5 тонна залалданған өнім тоқтатылды: мақсары, арпа және зығыр тұқымдарынан қауіпті карантиндік арамшөп – жатаған укекіре (горчак ползучий) табылды. Барлық жүк экспорттаушы елге кері қайтарылды. Бұл туралы ҚР Ауыл шаруашылығы министрлігінің Агроөнеркәсіптік кешендегі мемлекеттік инспекция комитеті хабарлады.
Заңбұзушылықтарды «Тасқала» және «Шаған» фитосанитариялық бекеттеріндегі өсімдіктер карантині жөніндегі мемлекеттік инспекторлар анықтады.
«Тасқала» бекетінде азық-түлікке арналған мақсары мен арпа тұқымдарының топтамалары тексерілді. Инспекторлар сынамалар алып, оларды фитосанитариялық сараптамаға жіберді. «Шаған» бекетінде азық-түлікке арналған зығыр тұқымының топтамасы тексеріліп, одан алынған сынамалар зертханалық зерттеулерге берілді.
«Фитосанитария» ШЖҚ РМК филиалының Батыс Қазақстан облыстық карантиндік зертханасының мамандары барлық сынамалардан жатаған укекіре (Acroptilon repens L.) тұқымын тапты. Бұл арамшөп карантиндік нысандарға жатады, сондықтан ел заңнамасына сәйкес залалданған өнімді ел аумағына кіргізуге рұқсат етілмеді.
Ауыл шаруашылығы министрлігі ведомствоның фитосанитариялық қауіпсіздікті қамтамасыз ету жұмыстарын жалғастыратынын қосты. Мақсат — Қазақстанға ауыл шаруашылығы өндірісіне қауіп төндіретін карантинге жатқызылған өнімдердің әкелінуіне жол бермеу.
Дереккөз: ҚР Ауыл шаруашылығы министрлігі