Caspianlife, 16 желтоқсан. Кеше Маңғыстау облысында республикалық маңызы бар «Жаңаөзен – Түрікменстан» тас жолының учаскесінде ауа райының нашарлауына және қалың қар жаууына байланысты жүк көліктері қар құрсауында қалып қойды.
Төтенше жағдайлар министрлігінің (ҚР ТЖМ) 112 Telegram-арнасында хабарланғандай, «… жүк көліктерінің бірі тіпті жол жиегінен шығып кеткен». Оқиға орнына дереу аймақтық құтқару бөлімшелерінің қызметкерлері көмекке аттанды. Құтқарушылар жолды қардан тазалап, көліктерді сүйреп шығарып, қозғалысты қалпына келтіруге көмектесті. Жұмыстар «ҚазАвтоЖол» қызметкерлерімен бірлесе атқарылды.
Сонымен қатар, ТЖМ қыс мезгілінде қауіпсіздік ережелерін сақтаудың маңыздылығын ескертеді: дауылды ескертулерге назар аударып, ауа райы нашарлаған жағдайда үйде қалған жөн. Төтенше жағдай туындаған жағдайда тәулік бойы жұмыс істейтін «112» құтқару қызметінің бірыңғай нөміріне қоңырау шалу қажет.