CaspianLife, 29 қараша. 1 желтоқсаннан бастап Атырау облысында «Киік-2024» табиғат қорғау акциясы басталады, ол бір айға созылады. Далада табиғат қорғау және құқық қорғау органдары тарапынан бақылау күшейтіледі.
Негізгі мақсат – киік популяциясын қорғау және көбейту, браконьерлікпен күресті күшейту және құқық бұзушылықтардың алдын алу. Бұл туралы Атырау облысы өңірлік коммуникациялар қызметінің алаңында өткен брифингте айтылды. Арнайы тапсырмалар бойынша табиғат қорғау полициясы тобының аға инспекторы Нұрлыбек Қанатовтың айтуынша, жыл басынан бері өңірде жануарлар дүниесін қорғау саласында 83 құқық бұзушылық анықталды. Оның ішінде 77 әкімшілік құқық бұзушылық және алты қылмыстық іс тіркелген.
– Облыс аумағында жыл сайын уәкілетті мемлекеттік органдармен бірлесіп «Киік» және «Браконьер» жедел-профилактикалық іс-шаралары өткізіліп тұрады, олардың мақсаты – киіктерді жоюды тоқтату, заңсыз өнім өндірумен және сатумен айналысатын тұлғаларды анықтау. Жұмыстардың нәтижесінде облыс аумағында әртүрлі құқық бұзушылықтар анықталды, 335 киік мүйізі мен жеті бірлік тіркелмеген тегіс оқты аңшы мылтығы тәркіленді, – деп хабарлады Н. Қанатов.
Атырау облыстық орман шаруашылығы және жануарлар дүниесі аумақтық инспекциясының бас маманы Мереке Шалхаровтың айтуынша, Қазақстанда сайғылардың үш популяциясы бар: Бетбақдала, Орал және Үстірт.
Брифинг барысында, соңғы жылдары киік саны артқанына қарамастан, браконьерлік, табиғи апаттар және мекендеу орындарының азаюы сияқты қауіптер әлі де өзекті болып отырғаны айтылды. Дегенмен, киіктерді ату және оларға қатысты қылмыстар өткен жылмен салыстырғанда азайған.
Мереке Шалхаровтың айтуынша, өткен жылы жеті қылмыстық іс тіркеліп, сотқа жолданды, мемлекетке 6,5 млрд теңге көлемінде залал өтелді. Биыл тіркелген қылмыстардан төрт қылмыстық іс сотқа жіберілді және мемлекетке шамамен 283 млн теңге залал өтелді. Тағы екі қылмыстық іс тергелуде.
Пресс-конференция барысында «Охотзоопром» өндірістік бірлестігінің бас директорының орынбасары Бақтияр Рамазанов киіктердің ең көп популяциясы Батыс Қазақстан облысында шоғырланғанын айтты.
– Қыстың басталуына байланысты киіктер көші-қон жолдарын өзгертіп, бүгінгі таңда Атырау облысына бағытталуда. Осыған байланысты жедел топтар күшейтілуде. Киік популяциясын қорғау және бақылау үшін 225 инспектор, шамамен 150 көлік құралдары жұмылдырылды. Инспекторлардың тиімді жұмыс істеуін қамтамасыз ету үшін оларға жоғары жол талғамайтын көліктер берілді, – деп мәлімдеді Б. Рамазанов.
(Сурет Қазақстан Республикасының Экология және табиғи ресурстар министрлігінің сайтынан алынған)