CaspianLife, 27 маусым — 28 маусым – Бұқаралық ақпарат қызметкерлері күніне орай Атырау облысының әкімдігінің қолдауымен футзалдан Тауман Амандосов атындағы ауыспалы кубок және волейболдан жарыс өтті. Бұл туралы өңірлік коммуникациялар қызметі хабарлады.
Тартысқа толы спорттық шарада жалпы саны 11 команда бақ сынады.
Футболдан жалпы есепте «CaspianNews» командасы 3-орынға табан тіреді. «Атырау-Ақпарат» құрамасы кестенің 2-сатысына жайғасты. Ал «Тауман» құрамасы екінші жыл жеңіс тұғырынан көрініп, І орынды иеленді.
Атырау облыстық бас редакторлар клубының Т. Амандосов атындағы ауыспалы кубогы клубтың ұйымдастыруымен екінші рет өтіп отыр. Кубок «Атырау-Ақпарат» ЖШС ғимаратындағы клуб музейінде сақталады.
Аймақтық аралас волейболдан І орынға «CaspianNews» құрамасы, ІІ орынға облысымыздың мемлекеттік органдардың баспасөз хатшыларынан құралған «Баспасөз хатшылары» құрамасы ие болды. Ал «Ақжайық» құрамасы үздік үштікті түйіндеді.
Сонымен қатар, Қазақстан Журналистер Одағы Атырау облыстық филиалының ұйымдастыруымен өткен «Хабар іздеуге…» атты 5 шақырымға жүгіруден Хабар агенттігінің Атыраудағы операторы Темірлан Сұлтанғазиев жүзден жүйрік шықты. Екінші орынды Атырау телеарнасының қызметкері Абай Өтегенов иеленсе, үшінші болып мәре сызығын Алмас Қабдолов кесіп өтті.
Ал әйелдер арасында жүгіруден «Ақ жайық» газетінің тілшілері Күнімай Күзембаева үздік болса, ІІ орынды Назым Елемесова иеленді. «Атырау облысындағы алғашқы біріккен газ-химиялық кешені» баспасөз хатшысы Нұргүл Хайруллина мәрі сызығын үшінші болып кесіп өтті.
Сондай-ақ, 50 жастан асқан БАҚ қызметкерлері арасында І орын Слухия Қаттарқызына, ІІ орын Алма Тұрғановаға және ІІІ орын Марина Қуанышеваға бұйырды.
