Супермаркетте он жылдан бері әкімші болып жұмыс істейтін Валентина Чигрина әлеуметтік аударымдардың жоқтығынан қажетті ота жасата алмай отырғанын айтты. Оның сөзінше, қызметкерлерден өз еркімен жұмыстан шығу талап етілуде.
– Бізден өз еркімізбен жұмыстан шығуды сұрайды. Бірақ өз еркімізбен шықсақ, жұмыссыздар есебіне тіркеле алмаймыз, – дейді ол.
Компаниядағы ең төменгі жалақы мөлшері шамамен 200 мың теңгені құрайды.
Қызметкерлердің мәселесіне жеткізушілер де қосылған. Олардың алдында да қарыздар жыл басынан бері өтелмеген. Жеткізушілердің бірі Арнольд Курбановтың айтуынша, «Marco» және «Супер Марко» серіктестіктері оның компаниясына шамамен 2,5 миллион теңге қарыз. Ал жалпы берешек көлемі 6 миллион теңгеге жеткен.
– Алты ай өтті. Қарыз әлі өтелген жоқ. Байланысқа да шықпайды, – дейді ол.
Бірқатар жеткізуші тауар жеткізуді тоқтатқандықтан, дүкен сөрелері босай бастаған.
«Marco» ЖШС-нің бас директоры Руслан Китаев қызметкерлермен кездесіп, компанияның қарыздарды өтеу бағытында жұмыс жүргізіп жатқанын мәлімдеді.
– Инвестор табылмаған күннің өзінде, қарыздар компания активтерін сату есебінен өтеледі, – деді ол.
Алайда қарыздың нақты қашан өтелетіні әзірге белгісіз. Егер іс сот орындаушыларына берілсе, өндіріп алу процесі бірнеше айға созылуы мүмкін.