Caspianlife, 29 тамыз. Бұл – Қазақстанның батысындағы алғашқы позитрон-эмиссиялық томография (ПЭТ/КТ) орталығы.
Маңғыстау облысы әкімдігінің баспасөз қызметінің хабарлауынша, орталық халық үшін жоғары технологиялық медициналық көмекті қолжетімді етіп, онкологиялық сияқты күрделі аурулардың рецидивтерін ерте кезеңде анықтауға мүмкіндік береді.
Бұған дейін Маңғыстау облысы мен көршілес өңірлердің тұрғындары ПЭТ/КТ тексеруінен өту үшін Астана немесе Алматы қалаларына баруға мәжбүр болатын. Ақтаудағы орталықтың ашылуы уақыт пен қаражатты үнемдеуге, сондай-ақ жасанды интеллект қолданылатын заманауи диагностика әдістеріне қол жеткізуге жол ашады.
Орталық жылына 2 мыңнан астам зерттеу жүргізуге қауқарлы және 25 жаңа жұмыс орнын құрады. Ашылудың алғашқы күні, 28 тамызда, бірнеше пациент ПЭТ/КТ тексеруінен өтті. Медициналық жабдықтар Германия, АҚШ және Оңтүстік Кореядан жеткізілді.
Жоба Orhun Medical компаниясы мен Маңғыстау облысы әкімдігінің қолдауымен жүзеге асты. Бұл бастама 2024 жылғы 4 желтоқсандағы жиыннан кейін қолға алынған. Сол күні облыс әкімі Нұрдәулет Қилыбай Мемлекет басшысының тапсырмасы аясында «Orhun Medical» ЖШС-нің бас директоры Дирик Гёненчпен кездесіп, заманауи онкологиялық орталық ашу және мамандарды оқыту жөнінде келісім жасалған болатын. Бұл қадам Маңғыстау тұрғындарының шетелде емделуге кететін шығынын азайтып, ел ішінде медициналық қызметтердің қолжетімділігін арттыруға бағытталған.
Әкімдік баспасөз қызметінің мәліметінше, 2025 жылдың жеті айында Маңғыстау облысында онкологиялық аурулардың әртүрлі сатысында 562 жағдай тіркелген. Атап айтқанда, 312 пациентте дерт 1–2 сатысында, 36 жағдайда – 3–4 сатысында, 157 адамда – 0–1 сатысында анықталды. Алғаш рет 57 пациентте ауру 4-сатысында диагностикаланған. Бұл көрсеткіштер өңірде онкологиялық ауруларды ерте анықтау жұмыстарының қарқынды жүргізіліп жатқанын айғақтайды.