CaspianLife, 31 желтоқсан. Қазақстан Ұлттық Банкі «Спорт» сериясынан «ҚАЗАҚСТАННЫҢ ФУТБОЛ КЛУБТАРЫ» және «ҚАЗАҚСТАННЫҢ ФУТБОЛ ФЕДЕРАЦИЯСЫ» коллекциялық монеталарын айналымға шығарады.
Қазақстан Ұлттық Банкінің (ҚҰБ) баспасөз қызметі хабарлағандай, монеталардың сатылымға шығатын күні туралы ақпарат ҚҰБ-тың ресми сайтында қосымша жарияланады.
ҚҰБ Қазақстан футбол федерациясымен бірлескен жоба аясында «ҚАЗАҚСТАННЫҢ ФУТБОЛ КЛУБТАРЫ» коллекциялық монеталарының он үш түрін айналымға шығарады.
Монеталарда 2024 жылғы маусымдағы Қазақстан премьер-лигасы клубтарының логотиптері бейнеленген. Әр түрі 7 000 данамен шығарылатын монеталардың 5 000 данасы жеке блистерлерде, ал қалған 2 000 данасы «ҚАЗАҚСТАННЫҢ ФУТБОЛ КЛУБТАРЫ» сувенирлік блистерлік жинақ құрамында ұсынылады.
Монеталар мельхиор қорытпасынан (МН 25) жасалған, салмағы 15 грамм, диаметрі 33 мм, brilliant uncirculated сапасымен, номиналы 200 теңге, әр түрінің тиражы 7 000 дана.
«ҚАЗАҚСТАННЫҢ ФУТБОЛ ФЕДЕРАЦИЯСЫ» монетасында Қазақстан футбол федерациясының логотипі бейнеленген. Бұл монета 2 000 данамен шығарылып, «ҚАЗАҚСТАННЫҢ ФУТБОЛ КЛУБТАРЫ» сувенирлік блистерлік жинағының құрамында сатылады.
Монеталар мельхиор қорытпасынан (МН 25) жасалған, салмағы 15 грамм, диаметрі 33 мм, brilliant uncirculated сапасымен, номиналы 200 теңге, тиражы 2 000 дана.
«Барлық монеталар Қазақстан Республикасының аумағында барлық төлем түрлері бойынша номиналдық құнына сәйкес қабылдануға міндетті, сондай-ақ банк шоттарына есепке алу, аудару, айырбастау және барлық банктерде айырбастау үшін жарамды. Коллекциялық монеталар Қазақстан теңге сарайында дайындалған», — делінген хабарламада.