Атырауда велосипедті қолды қылу жиілеген. Қызығы, оны ұрлайтын да, ұрлатып алатын да жасөсіпірімдер екен. Қалада жыл басынан бері осы сарынды 70 оқиға тіркелген. Оның 50-і табылып, иесіне қайтарылыпты.
– Велосипед ұрлығы көбінде жаз айларында болады және көпқабатты үйлердің кіреберісінен қолды қылып жатады. Мұндай қарақшылыққа баратын тек ер балалар емес, қатарында қыздар да бар, – Атырау қалалық ПБ КП бөлім басшысы Ануар Төлегенов.
Қолының сұғанағы барлар әдетте тұрғындардың көзіне түсе бермейді. Әйтсе де, ауладағы бейнебақылау камералары арқылы талай ұрлықтың беті ашылған. Алдымен көпқабатты үйдегілердің көңілін аулап есік ашуын өтінетін кішкентай ұрылар ойындағысын оп-оңай іске асырады. Мүлкіңізден айырылғыңыз келмесе, оны ерінбей өзіңізбен бірге үйге алып кірген жөн.
Егер қосдөңгелекті досыңызды жоғары қабаттан әрі-бері тасуға мүмкіндігіңіз болмаса, арнайы құлыпты қолданыңыз. Оның да ебін тапса, полицияға құжаттар мен суреттерді егжей-тегжейлі көрсетіп, арыздануға болады. Із кесудің ең оңай жолы – осы.