Зерттеу қорытындысы бойынша Қазақстан бір адамға шаққанда 5,4 литр көрсеткішпен әлемде 83-орынға тұрақтады. Осы көрсеткіш бойынша ел Камбоджа және Зимбабвемен қатар тұр. Сонымен бірге Қазақстан Орталық Азия мемлекеттері арасында көшбасшы атанды.
Өңірдегі көрші елдердің көрсеткіштері Қазақстаннан айтарлықтай төмен болды. Қырғызстанда бұл көрсеткіш 3,9 литрді (101-орын), Түрікменстанда 3 литрді (119-орын), Өзбекстанда 2,1 литрді (132-орын), ал Тәжікстанда небәрі 0,7 литрді (154-орын) құрады.
ТМД елдері арасында Қазақстан Ресейден (10,5 литр) және Беларустан (11,4 литр) кейін орналасқанымен, Арменияны (4,3 литр) және Әзербайжанды (2,3 литр) басып озды.
Әлемдік рейтингте бірінші орынды Румыния иеленді. Бұл елде жан басына шаққандағы алкоголь тұтыну көлемі жылына 17,1 литрді құраған. Алғашқы бестікке сондай-ақ Грузия (15,5 литр), Латвия (14,7 литр), Молдова (14,1 литр) және Чехия (13,7 литр) енді. Сарапшылардың пікірінше, рейтингтің жоғарғы сатысында дәстүрлі түрде шарап жасау мен күшті алкогольдік ішімдіктерді тұтыну мәдениеті қалыптасқан Шығыс және Орталық Еуропа елдері орналасады.
Ең төменгі көрсеткіштер Кувейт, Иран, Сирия және Пәкістанда тіркелген. Бұл елдерде жан басына шаққандағы алкоголь тұтыну көлемі жылына шамамен 0,1 литрді ғана құрайды.