Caspianlife, 25 мамыр. Бүгін еліміздің барлық мектептерінде соңғы қоңырау соғылды. Биыл оқу жылын 3,9 миллионнан астам оқушы аяқтаса, оның 215 мыңы – мектеп бітіруші түлектер. Сонымен қатар 31 мыңнан астам 9-сынып оқушысы мен 18 мың 11-сынып түлегі үздік аттестатқа үміткер болып отыр.
Биыл түлектер кеші алғаш рет тек мектеп қабырғасында өткізіледі. Оқу-ағарту министрлігі жергілікті атқарушы органдармен бірлесіп, мерекелік іс-шараларды мейрамханаларда, кафелерде, банкет залдарында және табиғат аясында өткізуге тыйым салды. Сондай-ақ ата-аналардан ақша жинауға, мұғалімдерге сыйлық беруге, автокеруен ұйымдастыруға және ивент-агенттіктердің қызметін пайдалануға рұқсат етілмейді.
Бұл шектеулер қоғамда түрлі пікір туғызды. Кейбір ата-аналар мұны жеке өмірге араласу деп санайды. Олардың пікірінше, ресми шара мектепте аяқталғаннан кейінгі мерекелеу әр отбасының өз таңдауы болуы тиіс.
Ал Мәжіліс депутаты Асхат Аймағамбетов бұл шешімді қолдайды. Оның айтуынша, кейбір өңірлерде түлектер кешіне қатысу үшін әр адамнан 500 мың теңгеге дейін қаржы жиналған. Бұл көптеген отбасылар үшін ауыр салмақ түсіретін шығын болып саналады.