CaspianLife, 11 желтоқсан. Атырау облысының әкімі Серік Шәпкенов Құрманғазы ауданының Сүйіндік ауылында тұрғындармен кездесу барысында осындай мәліметтерді жариялады.
Облыстық әкімдік таратқан ақпаратқа сәйкес, кездесуде өңір басшысы ауданның даму қорытындыларын және алдағы жылдарға арналған жоспарларды таныстырды.
Тұрғын үй және жер учаскелері:
Кадырка ауылында NCOC қолдауымен 60 пәтерлі үйдің құрылысы аяқталуға жақын. Әлеуметтік осал топтарға 107 пәтер сатып алынып, оның бір бөлігі берілді. Құрманғазы ауылындағы үш апатты үйдің тұрғындары толықтай қоныс аударды, келесі үш үйді көшіру жұмыстары жалғасады. Шипажай ықшам ауданында және Орлы ауылында 300-ден аса жер учаскесіне инженерлік инфрақұрылым тартылуда, олар кезектегілерге беріледі.
Коммуналдық инфрақұрылым және сумен жабдықтау:
Ауданда электр желілері мен көшелерді жарықтандыру жаңартылуда: Көптоғай, Ақкөл және Лазо ауылдарындағы жобалар аяқталды, трансформаторлар, тіректер және желілер ауыстырылып жатыр. Бөкейхан және Кудряшово ауылдарында су тазарту құрылыстары жаңартылуда, бұл шамамен 3 мың тұрғынды таза сумен қамтамасыз етеді. Он бір елді мекен бойынша жобалық-сметалық құжаттама әзірленуде, құрылыс 2026 жылы басталады.
Жолдар және көлік:
«Құрманғазы – Теңіз – Бірлік» жолының күрделі жөндеуі жалғасуда, негізгі бөлігі жаңа жабынмен қамтамасыз етілген. «Ақкөл – Ғ.Алипов – Жыланды – 4-разъезд – Кигаш» жолының 43 шақырымын реконструкциялау аяқталуға жақын; ауыл ішілік және кіреберіс жолдар салынып жатыр. 2024 жылдың желтоқсанынан бастап «Атырау – Құрманғазы – Атырау» бағыты бойынша алты тұрақты автобус рейсі қатынауда. Ақкөл ауылында жаңа теміржол вокзалының құрылысы жүріп жатыр.
Қауіпсіздік және әлеуметтік инфрақұрылым:
Ауданда 400 бейнекамера, оның ішінде 44 жылдамдық өлшейтін камера орнатылуда; жүйені 2026 жылы іске қосу жоспарланған. Бөкейхан және Сүйіндік ауылдарында өрт сөндіру бекеттері ашылды.
Он ауылда жаңа медпункттер, фельдшерлік-акушерлік пункттер және амбулаториялар пайдалануға берілді, жеті жедел жәрдем көлігі жеткізілді. Аудандық ауруханада МРТ қондырғысы үшін қосымша ғимарат салынып, стационар мен емхана күрделі жөндеуден өтуде. Құрманғазы ауылында жаңартылған әлеуметтік қызмет көрсету орталығы ашылды.
Білім, кәсіпкерлік, мәдениет және спорт:
Құрманғазы және Ақкөл ауылдарында жалпы 600 орындық екі мектеп салынуда, жыл соңына дейін аяқталады. Сегіз мектепке реновация жүргізіледі, Жасталап ауылында балалар лагері салынады. Шалғайдағы мектептерге спутниктік интернет тартылуда.
Биыл жеті жаңа кәсіпкерлік нысаны іске қосылды. Балық өңдеу зауыты, балық қабылдау цехы және кемпинг салу жобалары жүзеге асырылып жатыр, олар 200-ден астам жұмыс орнын ашады. Төрт ауылда Мәдениет үйлері салынды. Бірқатар елді мекендерде Мәдениет үйлері мен спорт кешендерінің құрылысы жүріп жатыр, жаңа спорт алаңдары ашылды.
Кездесу барысында тұрғындар ауыл шаруашылығы жерлерін қайтару және үлестіру мәселесін көтерді. Өңір басшысы жерді тиімді пайдалану принципі өзгермейтінін атап өтті: пайдаланылмайтын учаскелер мемлекет меншігіне қайтарылуы тиіс. Қайтарылған жерлер оны тиімді пайдалануға дайын азаматтарға заң аясында беріледі. Бұл жұмыс облыс әкімінің тікелей бақылауында.
Кездесу соңында тұрғындар денсаулық сақтау, жол және білім беру инфрақұрылымы, су және электрмен жабдықтау мәселелеріне қатысты сұрақтар қойды. Тиісті басшыларға нақты тапсырмалар берілді. Кейін облыс әкімі азаматтарды жеке қабылдады.
(Атырау облысы әкімдігінің баспасөз қызметі таратқан ақпарат бойынша)