CaspianLife, 5 желтоқсан. Атырауда болашақ полиэтилен зауытына арналған ірі габаритті бағаналарды дайындау қарқынды жүріп жатыр.
«ҚазМұнайГаз» ұлттық компаниясының хабарлауынша, «АтырауМұнайМаш» отандық машина жасау саласы үшін көлемі мен техникалық күрделілігі жоғары екі ірі габаритті бағананы өндіруде:
— Этиленді бөлу бағанасы (Ethylene Fractionator) – салмағы 1 470 тонна, биіктігі 101 метр, бүгінде жұмыстың 78% орындалған.
— Суыту бағанасы (Quench Tower) – салмағы 700 тонна, биіктігі 51 метр, дайындығы 55%.
Бұл бағаналар этанды этиленге айналдыратын пиролиз қондырғысының негізгі бөліктері болады. Монтаждау жұмыстары 2026 жылға жоспарланған.
Бұған қоса, атыраулық кәсіпорын су дайындау жүйесіндегі еріген газдарды жоюға арналған маңызды жабдық — деаэраторды да жасап жатыр.
«Silleno» ЖШС-інің АтырауНефтеМаш кәсіпорнымен әріптестігі Қазақстандағы ірі мұнай-газ химиясы жобасының жүзеге асуына отандық өндірушілердің қатысуын арттырып, жергілікті қамту үлесінің өсуіне ықпал етуде.
CaspianLife ескертпесі: «Silleno» ЖШС — Атырау облысында полиэтилен өндіру жобасының операторы. Компания «Ұлттық индустриялық мұнай-химия технопаркі» арнайы экономикалық аймағының қатысушысы болып табылады, жоба осы аумақта жүзеге асуда.