Бүгін «NСОС» компаниясы Маңғыстау облыстық жедел жәрдем стансасына үш жаңа автокөлікті табыстады. Бұл туралы МаңғыстауМедиа хабарлады.
«Соболь» жедел жәрдем көліктері «NСОС» компаниясының демеушілігімен өтеусіз негізде берілді. Жаңа көліктер мүгедектер арбасына арналған ағытпалы зембілі бар арбаша, оттегі тетігі, су беруге арналған электрлік сорғы мен қол жуғыш, жедел шақыру батырмасы сынды барлық қажетті құралдармен жабдықталған. Сонымен қатар, көлікте сөмкелерге арналған жүк сөрелері де бар. Алдыңғы есіктегі қосымша саты арқылы автобусқа ең кішкентай жолаушылар да оңай міне алады.
«NСОС» компаниясы жыл басынан бері Маңғыстау облысының денсаулық сақтау басқармасына «Соболь», «NEXT» және «Бизнес» маркалы ГАЗель көліктері базасындағы сегіз жедел жәрдем көлігін табыстаған еді. Аталған көліктердің барлығы да Евро-5 экологиялық стандартына және жедел жәрдем көліктеріне қойылатын жоғары талаптарға сәйкес келеді. Белсенді және бәсең қауіпсіздік жүйелерімен, заманға сай электр құралдарымен, кіріктірілген жарық диодты және климаттық жүйелермен жабдықталған.
Осындай көліктермен жедел жәрдем бригадалары жолсыз аумақтардағы оқиға орындарына ең қысқа мерзімде жетіп, науқасқа ыңғайлы жағдайда жәрдем жасай алады. Аталған компания жыл соңына дейін тағы бес жедел жәрдем көлігін сыйлауды жоспарлап отыр.