Caspianlife, 21 мамыр. Ақтау қаласы Өмірзақ ауылына қарасты Ақжелкен елді мекені маңындағы Каспий теңізі жағалауында жаңа эко-парк бой көтермек, деп хабарлады Caspian News.
Жобаның жалпы аумағы 67,5 мың шаршы метрді құрайды. Оны жүзеге асыруға 874 миллион теңге бөлінген. Оның ішінде шамамен 35,5 мың шаршы метр жерде абаттандыру жұмыстары жүргізіліп, 10 мың шаршы метрден астам аумақ көгалдандырылады.
Жоба аясында жағалау бойымен жаяу серуендеуге арналған жолдар, сәулеттік нысандар мен демалыс аймақтары салу жоспарланған. Сонымен қатар футбол, баскетбол, workout және үстел теннисіне арналған спорт алаңдары ашылады.
Әсет Басбаеваның айтуынша, эко-парк аумағында мүмкіндігі шектеулі азаматтарға арналған арнайы шомылу аймақтары да қарастырылған.
— Жобаны алдағы айларда бастауды жоспарлап отырмыз. Құрылыс келесі жылға өтпелі болады және жоба келесі жылы аяқталады, — деді ол.
Келушілердің қауіпсіздігі үшін аумаққа 54 бейнебақылау камерасы, дабыл сиреналарымен жабдықталған 27 бақылау тірегі және 165 көше жарықтандыру элементі орнатылады.
Жаңа эко-парк Каспий жағалауындағы демалыс инфрақұрылымын дамытуға бағытталған маңызды жобалардың бірі болмақ.