CaspianLife, 22 қаңтар. Бұған дейін хабарланғандай, өткен жексенбі күні, 18 қаңтарда таңертең Атырау облысы Жылыой ауданындағы Теңіз кен орнында ГТЭС-4 нысанында GT-9.3 газ турбинасының трансформаторы өртеніп, сағат 11:20-да GT-9.5 газ турбинасының трансформаторында да өрт шыққан.
Бүгін Энергетика министрлігінің баспасөз қызметі вице-министр Қайырхан Тұтқышбаевтың жағдайды бақылау және оператор компаниямен өзара іс-қимылды үйлестіру үшін Теңіз кен орнына барғанын хабарлады. 18 қаңтарда орын алған технологиялық ақаудың (газ турбиналық қондырғылардың ажыратылуы) барлық мән-жайын анықтау мақсатында арнайы комиссия құрылып, жұмысын бастады. Нақтылай айтқанда, комиссия құрамына Мемлекеттік энергетикалық қадағалау және бақылау комитетінің аумақтық департаментінің, Атырау облысы әкімдігінің энергетика басқармасының, «KEGOC» АҚ жүйелік операторының, сондай-ақ «Теңізшевройл» ЖШС (ТШО) өкілдері енді.
«Мұнай өндірудің уақытша тоқтатылуына қатысты: бұл шешім оператор тарапынан (ТШО) қызметкерлер мен жабдықтардың қауіпсіздігін қамтамасыз ету мақсатында қауіпсіздік хаттамаларына сәйкес қабылданды», — делінген хабарламада.
Қазіргі уақытта комиссия орын алған оқиғаның себептерін жан-жақты техникалық талдау жүргізіп жатыр. Инциденттің себептері мен салдарына қатысты барлық ресми қорытындылар мен түсініктемелер комиссия жұмысының нәтижесі бойынша ғана жарияланады. Жағдай Энергетика министрлігінің тұрақты бақылауында.