CaspianLife, 4 қыркүйек — Тасшағыл ауылдық округі аумағынан көктемгі су тасқынынан бөлінген екі жайылма учаскеден 2,7 млн-дай мөңке шабақтары құтқарылды, деп хабарлайды CaspianLife.
Құтқарылған балықтар орташа тереңдігі 2,5-3 метр шамасындағы Арал және Бәйтік көлдеріне жіберілді. Аталған көлдер шабақтардың емін-еркін өсуіне қолайлы. Сонымен қатар, бөлініп қалған су айдынының тереңдігі аз болуы және судағы оттегі мөлшерінің күрт азаюы салдарынан табылған 1,7 кг өлі мөңке балығының шабақтары жойылды.
Құтқару жұмыстарына МТЗ-82 тракторы тіркемесімен, жылжымалы су тасығыш бөшкелі тіркеме, Hidromek тракторы, Газель автокөлігі жұмылдырылып, 6 контейнер, 3 бөшке, 1 мотопомпа пайдаланылды. Құтқару жұмыстарына жауапты тұлғалармен қатар, ерікті түрде 13 ауыл тұрғыны қатысты. Қазіргі таңда, бөлініп қалған екі жайылма толықтай тазартылды,- деді Қызылқоға ауданы әкімінің орынбасары Ерболат Иғали.
