Caspianlife, 3 сәуір. Бұл туралы «AtyrauOil&Gas» көрмесінің жетекшісі Гаухар Бекманова журналистермен әңгіме барысында айтты. Бұған дейін хабарланғандай, 2 сәуірде Атырауда жыл сайынғы Солтүстік Каспий өңірлік көрмесі «AtyrauOil&Gas» өз жұмысын бастады.
Биыл көрме 22-рет өткізіліп отыр, оған 10 елден келген 97 компания қатысуда. Атап айтқанда, Австрия, Германия, Италия, Қазақстан, Қытай, Нидерланд, БАӘ, Пәкістан, Ресей және Сингапур. Мысалы, Италиядан 18 компанияның кең ауқымды ұлттық экспозициясы ұсынылған.
Сонымен қатар, көрме мемлекеттік органдардың өкілдері, ірі компаниялар мен салалық сарапшылар бас қосатын басты іскерлік алаң ретінде қызмет етеді. Олар өзекті мәселелерді талқылап, жаңа серіктестер тауып, мұнай-газ және құрылыс саласындағы озық технологияларды таныстырады.
Көрмеге қатысушылар мен БАҚ өкілдері үшін TEXOL компаниялар тобының «Махамбет» өнеркәсіптік-өндірістік кешеніне және «Kazakhstan Petrochemical Industries Inc.» (KPI) ЖШС-не өндірістік экскурсиялар мен баспасөз турлары ұйымдастырылды. Сондай-ақ, көрме аясында екі күн ішінде B2B форматында шамамен 180 кездесу өткізу жоспарланған.
«Біз көрмеге келушілер санының жыл сайын артқанын байқаймыз. Өткен жылы көрмемізге 2 100-ден астам адам келсе, биыл 3 000-ға жуық келуші күтілуде. Бұл тек алдын ала тіркелген адамдардың саны», — деді Гаухар Бекманова.
Алайда, көрмеге қатысатын компаниялардың саны өткен жылмен шамалас. Журналистермен сұхбат барысында көрме павильонының аумағы барлық қатысушыларды қабылдауға мүмкіндік бермейтіні анықталды.
«Бізде көрмеге қатысқысы келген, бірақ орын жетіспеген компаниялар болды. Биыл көрмеге 10 елден 97 компания қатысып жатса, қатысуға ниеттілер саны әлдеқайда көп болды. Көрме басталардан бір ай бұрын біз қосымша орындардың жоқтығына байланысты өтініш қабылдауды тоқтаттық. Ашық алаңда павильон ішінен орын жетпеген 11 компания өз өнімдерін ұсынуда. Ал тағы 20-дан астам компанияға қатысуға рұқсат бере алмадық. Бұл – Атыраудағы көрмеге деген жоғары қызығушылықтың көрсеткіші», — деді Г.Бекманова.
Оның айтуынша, іскерлік бағдарлама аясында бутадиен және силлено жобалары сияқты мұнай-газ химиясындағы жаңа жобалар талқыланады. Сервис компаниялары мен мердігерлер стратегиялық даму жоспарлары мен жаңа жобалардың сатып алу процестері туралы көбірек білгісі келеді. Сондықтан олар Атырауға келіп, тікелей байланыс орнатуға мүдделі.