CaspianLife, 31 наурыз. Батыс Қазақстан облысы бойынша Қаржылық мониторинг агенттігінің (ҚМА) департаменті азаматтардың банк есепшоттарына заңсыз қол жеткізу арқылы қылмыстық қаржылық операциялар жүргізуге бағытталған топтың заңсыз әрекеттерін тоқтатты.
ҚМА баспасөз қызметінің хабарлауынша, күдікті Вейднер Т.Е. үшінші тұлғалардың есепшоттарын пайдалану схемасын жасап, оны үйлестірген. Ол интернет арқылы алаяқтық жолмен алынған ақшаны аудару және қолма-қол ақшаға айналдыру үшін «дропперлерді» іздеді және әрбір серіктестің рөлін нақты бөліп берді. Дропперлерге осы әрекетке қатысқаны үшін 200–350 АҚШ доллары көлемінде сыйақы төленген.
Мысалы, 2025 жылғы қазанда Орал қаласының бір студентінің атынан банк есепшоттары ашылып, онлайн-банкингке қолжетімділік схеманы ұйымдастырушыға берілген. Аталған есепшоттар арқылы интернет алаяқтық жолымен алынған ақша қаражаттары айналымға түсіп, кейін айырбасталып шетелге аударылған. Есепшот иесі заңсыздықты түсініп, өз еркімен құқық қорғау органдарына жүгінген, бұл операцияларды уақытында шектеуге мүмкіндік берген. Есепшоттар бұғатталғаннан кейін күдікті мен оның серіктестері зардап шегушіге қысым көрсетіп, банктік қосымшаларды қайта верификациялауды талап еткен.
«Оны пәтерде заңсыз ұстап, зорлықпен мобильді телефонын ломбардқа тапсыруға мәжбүрлеген, ал алынған ақшаны өзара бөлісіп алған. Сонымен қатар, күдіктілер зардап шегушіні банктер мен әкімшілік органдарға ертіп барып, есепшоттардан шектеулерді алу әрекеттерін жасаған», — делінген хабарламада.
Схеманы ұйымдастырушы қамауға алынған, ал оның алты серіктесіне кепіл және кетпеу туралы қолхат түрінде шара қолданылған. Іс сотқа жолданған. Басқа ақпарат ҚР ҚПК-нің 201-бабына сәйкес жариялауға жатпайды.
Қаржылық мониторинг агенттігі ескертеді: «дропперлік» схемаларға, оның ішінде банктік реквизиттерді беру және есепшоттарға қолжетімділік қамтамасыз етуге қатысу — заңға қарсы әрекет болып табылады және қылмыстық жауапкершілікке әкеп соғуы мүмкін. Азаматтарға өз банк есепшоттарын заңсыз қаржылық операцияларға пайдалануға бермеу және сақтық танытуы қатты ұсынылады.