CaspianLife, 5 наурыз. Бүгін шамамен түскі уақытта Иран Ислам Республикасының аумағынан Әзербайжанның Нахчыван Автономиялық Республикасына ұшқышсыз ұшу аппараттары арқылы соққы жасалды.
Бұл туралы Әзербайжан Республикасының Сыртқы істер министрлігінің (СІМ) ресми мәлімдемесінде айтылды. Мәлімдемеде көрсетілгендей, бір дрон Нахчыван Автономиялық Республикасындағы әуежай терминалының ғимаратына соғылған, ал тағы бір дрон Шакарабад ауылындағы мектеп ғимаратының маңына құлаған.
«Иран Ислам Республикасының аумағынан жасалған бұл дрондық шабуылдарды қатаң айыптаймыз. Соның салдарынан әуежай ғимараты зақымданып, екі бейбіт тұрғын зардап шекті. Әзербайжан Республикасының аумағына жасалған бұл шабуыл халықаралық құқықтың нормалары мен қағидаттарын бұзу болып табылады және өңірдегі шиеленісті күшейтеді. Біз Иран Ислам Республикасынан осы оқиға бойынша қысқа мерзім ішінде нақты түсініктеме беруді, тиісті тергеу жүргізуді және мұндай шабуылдардың болашақта қайталанбауы үшін шұғыл шаралар қабылдауды талап етеміз», — делінген Әзербайжан СІМ мәлімдемесінде.
Сондай-ақ әзербайжан тарапы тиісті жауап шараларын қабылдау құқығын өзінде қалдыратыны атап өтілді. Иран Ислам Республикасының Әзербайжан Республикасындағы Төтенше және Өкілетті елшісі Моджтаба Демирчилу Әзербайжан СІМ-іне шақырылып, Иран тарапына қатаң наразылық білдіріліп, тиісті нота табысталатыны хабарланды.