CaspianLife, 30 қаңтар. Бүгін, 30 қаңтарда Ақтау қаласында облыс әкімі Нұрдәулет Қилыбай өңірдің зиялы қауым өкілдерімен кездесті. Жиынның басты тақырыбы — Мемлекет басшысы Қасым-Жомарт Тоқаевтың Ұлттық құрылтайдың V отырысында белгілеген стратегиялық міндеттерін іске асыру болды.
Кездесуді ашқан өңір басшысы Президент ұсынған реформалардың ел болашағы үшін маңыздылығына тоқталды. Оның айтуынша, қоғамды жаңғырту мен ұлттық бірегейлікті нығайтуда зиялы қауымның рөлі ерекше.
«Қазіргі таңда экономикалық өсім мен халықтың әл-ауқатының артуы жүргізіліп жатқан реформалардың нақты нәтижесі. Президент белгілеген стратегиялық міндеттерді өңір деңгейінде сапалы орындау үшін бізге зиялы қауымның қолдауы мен парасатты пікірі қажет», — деді Нұрдәулет Қилыбай.
Жиын барысында өңірдің рухани және әлеуметтік-экономикалық дамуына қатысты бірқатар маңызды мәселелер көтерілді:
— Мәдени мұра: Маңғыстаудың бірегей жерасты мешіттерін ЮНЕСКО-ның Бүкіләлемдік мұралар тізіміне енгізу жұмыстарын жандандыру;
— Экология және тазалық: «Таза Қазақстан» жалпыұлттық бастамасын өңірде ілгерілету;
— Технологиялық даму: Цифрландыру мен жасанды интеллектіні енгізу, энергетика және логистикалық инфрақұрылымды жетілдіру;
— Қоғамдық құндылықтар: Отаншылдық тәрбие, әлеуметтік әділеттілік және жауапты азаматтық ұстанымды қалыптастыру.
Зиялы қауым өкілдері Мемлекет басшысының бастамаларын толық қолдайтынын жеткізіп, оларды өмірге енгізу тетіктері бойынша өз ұсыныстарын білдірді.
Кездесу қорытындысы бойынша, Ұлттық құрылтайда айтылған басымдықтар Маңғыстаудың рухани және экономикалық дамуына жаңа серпін береді деген ортақ шешім қабылданды.
