Caspianlife, 9 қаңтар. «Қазақстанның Автокөлік Одағы» (ҚАО) мәліметіне сәйкес, 2025 жылы Қазақстанда барлық типтегі автокөлік құралдарының (жеңіл автокөліктер, автобустар, жүк көліктері) 171 144 бірлігі өндірілді. Өндірілген өнімнің жалпы құны 2,3 трлн теңгеден асты. Бұл көрсеткіш өткен жылмен салыстырғанда (145 290 бірлік) 17,8%-ға жоғары, ал өнім көлемі 1,9 трлн теңгені құраған еді.
ҚАО баспасөз қызметінің хабарлауынша, «бұл – қазақстандық автопром тарихындағы ең жоғары нәтиже». Сондай-ақ 2025 жылдың қорытындысы бойынша сала өңдеу өнеркәсібінің жалпы көлемінің шамамен 8%-ын қамтамасыз етіп, 41,7% үлеспен машина жасау саласында жетекші орынға ие болғаны атап өтілді.
2025 жылы автокөлік өндірісіне салынған инвестициялар 113,6 млрд теңгеден асты. Бұл қаражат қолданыстағы зауыттарды жаңа жабдықтармен жарақтандыруға және автокомпоненттер шығаратын жаңа өндірістерді іске қосуға бағытталған. Алматы мен Қостанайда Astana Motors Manufacturing Kazakhstan және Kia Qazaqstan жаңа зауыттары ашылды. Бұл саладағы жұмыспен қамтуға оң әсер етті: жұмыс істеп тұрған автокөлік кәсіпорындарындағы қызметкерлер саны 11 153 адамға дейін өсті.
Анар Мақашева, ҚАО президенті:
«2025 жыл қазақстандық автопром үшін сапалы өсім жылы болды. Өндірістік қуаттарды кеңейту мен жаңа кәсіпорындардың іске қосылуы жұмыс орындарының көбеюіне тікелей әсер етті – бүгінде салада 11 мыңнан астам маман еңбек етеді. Автомобиль өнеркәсібі машина жасау құрылымындағы позициясын нығайтып, оның 41%-дан астамын және өңдеу секторының шамамен 8%-ын қамтамасыз етуде. Компонент өндірушілерінің сенімі артып, жаңа инвестициялар тартылуда, ал қазақстандық автокөліктер ішкі нарықта барған сайын маңызды орын алуда. Алдағы уақытта локализацияны арттыру және өндірісті дамыту бойынша ауқымды міндеттер тұр».
2025 жылы жеңіл автокөлік өндірісі негізгі үлесті сақтап, 2024 жылғы көрсеткіштермен салыстырмалы болды – 158 944 бірлік (+19%). Коммерциялық автокөліктер өндірісі 12 200 бірлікті құрады (+8%).
Өндірушілер бөлінісінде Қостанайдағы Allur («СарыарқаАвтоПром») зауыты 2025 жылы 92 100 бірлік (жеңіл және жүк көліктері) шығарды, бұл өткен жылмен салыстырғанда +1,8%. Алматыдағы Hyundai Trans Kazakhstan 52 040 жеңіл автокөлік өндірді (+14,6%). Жаңа Astana Motors Manufacturing Kazakhstan зауыты іске қосылғаннан кейінгі төрт айда 15 180 автокөлік шығарды. Семейдегі СемАЗ 3 728 бірлік коммерциялық техника өндірді (-5,3%). Kia Qazaqstan зауыты үш айда 2 885 автокөлік шығарды. Қарағанды облысы Саран қаласындағы QazTehna зауытында 2 665 бірлік коммерциялық техника өндірілді (+69,1%). Көкшетаудағы «КАМАЗ Инжиниринг» 1 426 жүк көлігін шығарды (-6,4%), Алматыдағы Hyundai Trans Almaty 754 бірлік коммерциялық техника өндірді (-5,3%), Daewoo Bus Kazakhstan (Семей) 341 бірлік техника, ал «ОралАгрореммаш» 25 бірлік арнайы техника шығарды.
(ҚР Ұлттық статистика бюросының 2025 жылғы 11 айдағы деректері бойынша)
Дереккөз: www.caspianlife.kz
Суретте: Алматы қаласындағы Hyundai Trans Kazakhstan зауыты («Астана Моторс» еншілес кәсіпорны).
Автор: Рахим Қойлыбаев.