Caspianlife, 3 сәуір. Қазақстан Республикасы Сауда және интеграция министрлігі АҚШ-тың бірқатар тауарларға кедендік баж салығын енгізуіне қатысты мәлімдеме жасады.
Министрліктің ресми сайтында жарияланған мәлімдемеде АҚШ тарапы қабылдап жатқан жаңа сауда шараларының алдын ала талдауы жүргізілгені айтылған. Оның нәтижесінде, Қазақстанның АҚШ-қа экспортының басым бөлігі қосымша тарифтердің әсеріне ұшырамайтыны анықталды, себебі бұл тауарлар АҚШ әкімшілігінің нормативтік актілерінде қарастырылған ерекшеліктер тізіміне енгізілген.
«Қазақстан Республикасы Ұлттық статистика бюросының мәліметтері бойынша, 2024 жылдың қорытындысында Қазақстан мен АҚШ арасындағы тауар айналымы 4,2 млрд АҚШ долларын құрады, бұл өткен жылмен салыстырғанда 4%-ға жоғары (4,1 млрд АҚШ доллары). 2024 жылы Қазақстанның АҚШ-қа экспорты 30,6%-ға өсіп, 2,0 млрд АҚШ долларын құрады. АҚШ-тан Қазақстанға импорт 2,2 млрд АҚШ долларына жетті.
Қазақстанның АҚШ-қа экспортының негізгі бөлігін шикі мұнай, уран, күміс, ферросплавтар және басқа да тауарлар құрайды. Бұл тауарлар АҚШ Президентінің «Импортты реттеу және АҚШ-тың тұрақты сауда тапшылығына әкелетін сауда тәжірибелерін жоюға арналған өзара тарифтер туралы» Жарлығында көрсетілген ерекшеліктер тізіміне енгізілген. Бұл санаттар жалпы экспорттың 92%-ын құрайды.
Қосымша кедендік баж салықтары 2024 жылы экспорты 95,2 млн АҚШ долларына жеткен кейбір тауарларға қолданылады. Олардың ішінде фосфор (15,9 млн АҚШ доллары), ферросилиций (12,7 млн АҚШ доллары), линзалар (4,1 млн АҚШ доллары), бидай глютені (4 млн АҚШ доллары), аммоний нитраты (2,4 млн АҚШ доллары) бар. Енгізілген тарифтік шаралар Қазақстанның АҚШ-қа жалпы экспортының тек 4,8%-ын қамтиды. Қазақстан үкіметі қосымша баж салығын қолданбау мүмкіндігін талқылау үшін АҚШ тарапымен кеңес өткізуді жоспарлап отыр.
Қазақстан Республикасы он жылдан астам уақыт бойы Дүниежүзілік сауда ұйымының (ДСҰ) мүшесі болып табылады және сыртқы сауда саясатын жүзеге асыруда оның қағидаттарын қатаң ұстанады. АҚШ-пен екіжақты ынтымақтастық аясында Қазақстан халықаралық міндеттемелерге сәйкес саудадағы тең және кемсітусіз жағдайларды қамтамасыз етеді.»
Дереккөз: www.caspianlife.kz