CaspianLife, 20 желтоқсан. Астраханьда Каспий теңізінің су биологиялық ресурстарын сақтау, ұтымды пайдалану және олардың ортақ қорларын басқару жөніндегі Комиссияның 8-ші сессиясы өтті.
Ресейдің Балық шаруашылығы федералды агенттігінің баспасөз қызметінің хабарлауынша, отырысқа Каспий маңы елдерінің өкілдері: Ресей, Әзербайжан, Иран, Қазақстан және Түрікменстан қатысты. Тараптар 2023 жылғы балық шаруашылығы қызметінің нәтижелері бойынша Комиссияға есептер ұсынды.
Каспий теңізінің су биологиялық ресурстарын сақтау, ұтымды пайдалану және олардың ортақ қорларын басқару жөніндегі комиссияның отырысында бірлескен ғылыми зерттеулер мен бекіре тұқымдас балықтарды жасанды жолмен көбейту барысында олардың шабақтарын жіберу мәселелері талқыланды. Сондай-ақ, бекіре тұқымдас балықтарға арналған бірлескен зерттеу жұмыстарын өткізу туралы және 2025 жылға Каспий теңізіндегі су биоресурстарын аулау көлемдерін келісу шешімі қабылданды.
2023 жылы бекіре тұқымдас балықтардың шабақтарын жіберу көлемі келесідей болды: Ресей кәсіпорындары – 34,5 млн дана, Қазақстан кәсіпорындары – 1,9 млн дана, Әзербайжан кәсіпорындары – 618,7 мың дана.
«Тараптар бекіре тұқымдас балықтарды коммерциялық аулауға 2025 жылға дейін тыйымды ұзарту және 2025 жылы бекіре тұқымдас балықтардың уылдырығы мен етіне экспорт квоталарын белгілемеу туралы келісті. Бекіре тұқымдас балықтарды аулау алдағы жылы да тек ғылыми зерттеулер мен жасанды көбейту мақсатында жүзеге асырылатын болады», – деп атап өтті Росрыболовство баспасөз қызметі.
Сонымен қатар, балық қорларын қорғау үшін Каспий маңы елдері балық шаруашылығын қорғау және жасанды көбейту шараларын синхрондау туралы келісті. Ресей тарапы Каспий маңы мемлекеттерінің Балықшылар форумын өткізу және Каспий комиссиясының жыл сайынғы бюллетенін, сондай-ақ Каспий теңізін зерттеу бойынша мерейтойлық ғылыми мақалалар жинағын шығару туралы ұсыныс жасады.
8-ші сессия қорытындысы бойынша комиссия отырысының хаттамасына қол қойылды, онда қабылданған шешімдер көрсетілген. 2025 жылғы 1 қаңтардан бастап Каспий комиссиясына төрағалық ету кезекпен Түрікменстанға өтеді.
«Он жыл бұрын, 2014 жылғы 29 қыркүйекте, Астрахань қаласында Каспий маңы мемлекеттерінің президенттері Каспий теңізінің су биологиялық ресурстарын сақтау және ұтымды пайдалану туралы келісімге қол қойған болатын. Осы келісімді іске асыру үшін Каспий теңізінің су биологиялық ресурстарын сақтау, ұтымды пайдалану және олардың ортақ қорларын басқару жөніндегі комиссия құрылды», – деп еске салды Балық шаруашылығы федералдық агенттігі.
