CaspianLife, 18 қараша — Атырау облысы Индер аудандық ПБ қызметкерлері «Браконьер-2022» жедел-профилактикалық іс-шарасын өткізу барысында Қызыл кітапқа енген киік жануарының мүйізін заңсыз сақтаған азаматты ұстаған.
Анықталғандай, 12 қараша күні сағат 23:30 шамасында Индер АПБ полиция қызметкерлері «Охотазоопром» Батыс өңірлік филиалының инспекторларымен бірлесіп Сыралы учаскесіндегі қыстақтардың бірінен 8 дана киік жануарына тән мүйіздерін тәркіледі. Күдікті ретінде анықталған Өрлік ауылының 64 жастағы тұрғыны.
Қазіргі уақытта аталған дерек бойынша ҚР ҚК 339 бабының 1-1 бөлігі «Киікті заңсыз қолға түсіру, жою, сол сияқты заңсыз қолға түсірілген киіктің мүйіздерін иемдену, сақтау, өткізу, тасымалдау» сотқа дейінгі тергеп-тексеру амалдары жүргізілуде.